Руперт Мардок се извини јавно | Свет | DW | 16.07.2011
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Свет

Руперт Мардок се извини јавно

Со платен оглас во сите британски весници, медиумскиот магнат Руперт Мардок денеска јавно им се извини на сите кои биле погодени од скандалот со прислушување во весникот „Њуз оф д ворлд.“

Извинувањето ќе биде објавено и во утрешните (17.07) изданија

Извинувањето ќе биде објавено и во утрешните (17.07) изданија

Закупувајќи по една страница во сите саботни изданија на весниците што се дистрибуираат низ целата земја, Мардок, во свое име и во името на компанијата, изразува „длабоко жалење“ за постапките на вработените во весникот, опишувајќи ги како „крајно сериозно, погрешно однесување.“

Истиот оглас, со жалење и извинување за прислушувањето на говорната пошта на мобилните телефони на голем број познати личности од јавниот и политичикиот живот, но и на обични луѓе, ќе се појави и во утрешните, неделни изданија на весниците.

Во лондонски хотел Мардок синоќа (15.07) се сретна со мајката и сестрата на девојчето Мили Даулер, која во 2002 година беше убиена под се` уште нерасчистени околности. На неочекуваната средба медиумскиот магнат им се извинил на најблиските, затоа што новинарите на „Њуз оф д ворлд“, во трката по ексклузивитет, ги прислушувале и нивните мобилни телефони.

Rupert Murdoch nach Treffen mit den Eltern der ermordeten Milly Dowler in London Flash-Galerie

Мардок по средбата со семејството на девојчето Мили Даулер

Во тоа време главен уредник на неделникот беше Ребека Брукс, која поради скандалот и силниот политички притисок во Велика Британија, вчера поднесе оставка на својата досегашна функција - главен директор на печатените медиуми во „Њуз Интернешенел“. Оставка синоќа поднесе и Лес Хитон, еден од директорите на компанијата „Њуз корп.“ на Мардок, со седиште во Њујорк. Од 1995 до 2007 година Хитон беше директор во британската филијала на компанијата „Њуз интернешенел“. На едно од поранешните сослушувања околу скандалот со прислушувањето, тој рече дека поранешниот главен уредник на „Њуз оф д ворлд“, Енди Коулсон, не знаел ништо за прислушувањата.

Автор: ТТ/ЕМФ/миа

Редактор: Елизабета Милошевска Фиданоска

DW.COM