Република Северна Македонија прво стигна на јужната граница | Македонија | DW | 11.02.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Македонија

Република Северна Македонија прво стигна на јужната граница

На „Илинденска“ број 2 веќе ги нема буквите „Влада на Република Македонија“. Таблите со новото име на државата ќе почнат да се поставуваат неделава.

Mazedonien Regierungssitz in Skopje (DW/P. Stojanovski)

Буквите се веќе тргнати од зградата на Владата

„Не стигнав ни да се фотографирам со старите натписи...“ „Без патетика молам, дојдете да ја видите мојата колекција: ФНРЈ, СФРЈ, НРМ, СРМ, РМ/ПЈРМ...“ Ова се дел од коментарите на социјалните мрежи откако утрово на „Илинденска“ број 2 веќе ги нема буквите „Влада на Република Македонија“. Истовремено табла со македонскиот државен грб и двојазичен натпис Република Северна Македонија / Republic оf North Macedonia е подготвена за поставување на преминот „Богородица“ на македонско-грчката граница. Фотографија од граничната табла објавија и повеќе грчки медиуми, со неофицијални најави дека таа ќе биде поставена денеска.

Нота од Атина

Она што засега е официјално потврдено е дека од Атина денеска до Скопје ќе биде испратена вербална нота, со која Грција ќе информира дека го ратификувала Договорот од Преспа и Протоколот за членство во НАТО. Како што информираше грчкиот заменик министер за надворешни работи, Јоргос Катругалос, ќе почнат да течат роковите за воведување на новото уставно име „на сите меѓународни форуми, во сите меѓународни организации, во билатералните односи, но и внатрешно.

Georgios Katrougalos EU Abgeordneter aus Griechenland (privat)

Јоргос Катругалос: Роковите почнуваат да течат

„Ќе следи систематско планирање за целосна замена на старото со новото име на објекти и документи, како што беше договорено со Преспанскиот договор“, одговори Катругалос на новинарски прашања.

Од „Илинденска“ број 2 веќе објаснија дека со одлуките поврзани со имплементацијата на одредбите од Преспанскиот Договор се предвидени сет од мерки и активности што треба да ги преземе Владата, но и сите органи на државната управа и државни институции. Тие обврски произлегуваат од усвоените амандмани на Уставот, а ќе стапат на сила 7 дена по влегувањето во сила, односно по ратификацијата во грчкиот парламент на Протоколот за македонско пристапување во НАТО, кое беше реализирано на 8-ми февруари. Според тоа, во прашање се неколку дена за последни подготовки, а веќе е извесно дека Владата, Министерството за надворешни работи, Министерството за одбрана и Собранието ќе бидат првите институции кои ќе ги заменат старите табли со нови на кои ќе го пишува името Република Северна Македонија. 

Повеќе:

Грчкиот парламент го отвори патот за Северна Македонија

Столтенберг и Димитров: Ова е историски ден

Национален акциски план

Подготовките за промена на таблите и натписите започнаа на крајот од минатиот месец, со заклучоците што ги донесе Владата на 117-тата седница, одржана на 29 јануари.

„Надлежните министерства, државни органи и институции, јавните претпријатија и акционерските друштва во сопственост на државата во предвидениот рок по стапувањето на сила на амандманите 33, 34, 35 и 36 на Уставот на Република Македонија, ќе треба да извршат промена на таблите на граничните премини и државната граница на нашата земја, на дипломатско-конзуларните претставништва, како и на влезовите на институциите. За истата постапка, соодветни препораки ќе добијат и единиците на локалната самоуправа, додека пак, секторите и службите за односи со јавност на државните и јавните институции добиваат насоки за употреба на уставното име согласно со усвоените амандмани“, соопшти Владата.

Владата ги задолжи државните органи да формираат работни групи за утврдување на натамошните активности за извршување на одредбите на Договорот од Преспа, а Генералниот секретаријат на Владата да формира Меѓуресорска група која ќе треба да изработи сеопфатен Национален акциски план за истите цели. На седницата било прифатено обврските за извршување на преспанските одредби да се усогласат и со Законот за употреба на јазиците, што значи дека при изработка на новите табли и натписи, дел од нив, ќе бидат напишани и на албански јазик.

Mazedonien Regierungssitz in Skopje (DW/P. Stojanovski)

На седницана Владата било прифатено обврските за извршување на преспанските одредби да се усогласат и со Законот за употреба на јазиците

Заедничко писмо до Гутереш

Пред два дена македонското Министерство за надворешни работи информираше што ќе следи откако ќе се исполнат сите правни услови за влегување во сила на Конечната Спогодба и Уставните амандмани.

„Владата ќе го објави во 'Службен весник' датумот на влегување во сила на Уставните амандмани и Уставниот закон. Потоа, Република Северна Македонија и Грција ќе достават заедничко писмо до Генералниот секретар на ООН, со кое го информираат Антонио Гутереш за датумот на влегување на сила на Конечната Спогодба, со што се става крај на повеќедеценискиот билатерален спор меѓу двете земји. По ова, Република Северна Македонија на соодветен начин ги информира Секретаријатот на ООН, земјите-членки, земјите набљудувачи на ООН, како и сите останите меѓународни организации чија членка е, за настанатите промени“, информираше МНР, со назнака дека „сето ова се очекува да се случи во следните неколку дена“, за што јавноста ќе биде информирана.

DW.COM

Реклама