Женбеков тврди дека ја контролира ситуацијата

Претседателот на Киргистан, Соронбај Женбеков, се огласи со соопштение во кое тврди дека ја има под контрола ситуацијата во земјата. Шефот на државата „ја контролира ситуацијата и е уверен дека сите политички сили ги стават интересите на земјата пред сопствените интереси“, се вели во соопштението од Претседателскиот кабинет објавено изутринава. Според соопштението, Женбеков бара да не се пука на демонстрантите и „да не се пролева крв“. Освен тоа, тој побарал од Изборната комисија да „ги провери внимателно“ евентуалните неправилности на парламентарните избори и „доколку е неопходно“ да го анулира изборниот резултат, се вели во соопштението.

Во главниот град Бишкек вчеравечер дојде до големи безредија и судири на демонстрантите со безбедносните сили, во кои се повредени околу 600 лица, а има и еден загинат. Опозициските партии обвинуваат за изборна измама. Во текот на судирите, демонстранти упаднаа во седиштето на владата и во парламентот. Освен тоа, според очевидци, на критичарите на претседателот Женбеков им успеало од затвор да го ослободат поранешниот шеф на државата Алсамбек Атамбајев.

На снимки објавени на интернет се гледа како 64-годишниот Атамбајев им мавта на своите приврзаници при излегувањето од затворот. Атамбајев беше претседател на Киргистан од 2011 до 2017 година. Откако беше уапсен во август минатата година поради корупција и врски со мафијата, во Киргистан избија жестоки безредија. Приврзаниците на Атамбајев, кој беше осуден на 11 години затвор, сметаат дека постапките против него се политички мотивирани.