Петта ноќ протести во Иран, расте бројот на жртвите | Свет | DW | 02.01.2018
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Реклама

Свет

Петта ноќ протести во Иран, расте бројот на жртвите

Девет лица ги загубиле животите во текот на ноќта во новата рунда протести во повеќе ирански градови. Стотици луѓе се уапсени, а предизвикана е и голема материјална штета.

Во петтата ноќ од протестите во Иран загинале најмалку девет лица, јави државната телевизија, а повеќе од 100 се уапсени од полицијата. Шест демонстранти загинале во судир со безбедносните сили откако ја нападнале локалната полициска станица во градот Чахдеријан. Уште две лица, меѓу нив и еден член на Револуционерната гарда загинале во регионот на Исфахан, а еден полицаец загинал во Наџафабад откако бил застрелан со ловџиска пушка. Севкупно, од избувнувањето на протестите во четвртокот минатата недела, досега загинале најмалку 21 лица во земјата.
Мали групи демонстранти се појавиле на улиците на Техеран синоќа, но полицијата брзо го вратила мирот во градот. Немирите и натаму се фокусирани на мали провинциски градови. Протестите, најголеми во Иран од 2009 година, продолжија и покрај заканата на претседателот Хасан Рохани дека ќе се пресмета со „демонстрантите и прекршителите на законот“.

Hassan Rohani (picture-alliance/Iranian Presidency Office)

Иранскиот претседател Хасан Рухани


Според Али Шамкани, секретар на иранскиот Врховен совет за безбедност, немирите се „прокси војна против иранскиот народ“.
„Хаштагови и пораки за состојбата во Иран доаѓаат од САД, Велика Британија и Саудиска Арабија“, изјави тој за локалните медиуми.

Претседателот Рохани го минимизираше значењето на немирите, кои започнаа во градот Машдад како изблик на незадоволство од лошата економска состојба во државата, но набрзо се насочија против исламскиот режим со извици од типот „Смрт за диктаторот“.
„Ова не е ништо“, рече Рохани во пишана изјава, „нашиот народ ќе се справи со ова малцинство кое извикува слогани против законот и волјата на народот, и ги навредува светостите и вредностите на револуцијата“.
Во неколку градови беа одржани и про-режимски демонстрации.

Iran Protest in Teheran (Fars)

Протестите се шират низ повеќе провинциски градови. Во главниот град Техеран засега е мирно

Најголемата разлика со големите протести во 2009, кои започнаа како резултат на обвинувањата за местење на изборите, е дека овие протести не се фокусирани на главниот град Техеран, туку насекаде низ државата. Рохани беше избран за претседател во 2013 година со ветување дека ќе ги намали економските и социјалните тензии, но високите трошоци за живот и невработеноста од 12 проценти доведоа до ескалација на незадоволството. Во најтешка ситуација се младите од кои повеќе од 40 проценти немаат работа, а особено тешко погодени се руралните области.
ЕУ го повика Техеран во понеделникот да им го гарантира правото на протест на своите граѓани.

DW.COM

Реклама