Пендаровски: Добрата вест е што португалското преседателство заврши | Северна Македонија | DW | 30.06.2021
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Реклама

Северна Македонија

Пендаровски: Добрата вест е што португалското преседателство заврши

Претседателот на државата Стево Пендаровски денеска од Загреб остро ги критикуваше изјавите на португалското претседателство во врска со македонскиот јазик. Скопје нема да се противи Албанија сама да продолжи кон ЕУ.

Изјавите на португалските претставници пред крајот на претседавањето на Лисабон со ЕУ, се длабоко погрешни, оцени претседателот Стево Пендаровски. Тој на заедничка прес-конференција со хрватскиот колега Зоран Милановиќ во Загреб ги коментираше последните изјави од Лисабон кои предизвикаа шок во Скопје.

„Искрено жалам поради длабоко погрешните изјави кои ги поткопаа сите напори и одличниот и балансиран предлог со кој претходно излезе португалскиот министер за надворешни работи Да Силва“, рече Пендаровски.

„Од историчари кои се занимаваат со политика, полоши се само политичари кои се обидуваат да толкуваат историски епохи“, вели тој.

Реакциите се предизвикани од изјавата на државната секретарка за европски прашања на Португалија, Ана Паула Закаријаш во однос на македонскиот јазик. Таа го нарече македонскиот јазик „северномакедонски“, и оцени дека „некогаш бил дел од бугарскиот јазик“. 

„Добрата вест е што португалското претседателство заврши, се надевам дека словенечкото претседателство ќе продолжи долж истата патека со полно уважување на виталните национални и државни интереси на двете страни, инаку не може да се дојде до договор“, рече Пендаровски.

Шефот на државата смета дека Северна Македонија нема морално право да бара Албанија да не се одвојува во процесот на проширување на ЕУ, доколку продолжи бугарската блокада.

„Доколку блокадата од Бугарија, не дај боже, продолжи со години ние немаме морално право да и го блокираме патот на Албанија кон ЕУ. Северна Македонија веќе со години го заслужува тоа, но ние нема да се противиме на одвојувањето на Албанија“, рече Пендаровски.

Deutschland Kroatien Steinmeier Milanovic

Оспорувањето идентитет и јазик е погрешно и неморално

Хрватскиот претседател Зоран Милановиќ оцени дека изјавата на португалската министерка е „резултат на невнимателност“. Тој повлече аналогија меѓу бугарските барања и односите на неговата земја со соседите.

„Што би се случило кога Хрватска би го оспорувала бошњачкиот или црногорскиот јазик или идентитет? Тоа е погрешно и неморално“, рече Милановиќ.

„Кога ќе почнете да влегувате во интимниот простор на една држава тоа никогаш не завршува добро, посебно кога мотивите се ниски. Нема да кажам дека се ниски, туку опортунистички“, додаде хрватскиот претседател.

 

DW.COM