Паднаа најповолните понуди на акшам пазар | Северна Македонија | DW | 24.12.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Реклама

Северна Македонија

Паднаа најповолните понуди на акшам пазар

Вклучете го телевизорот и ќе ги видите лошите луѓе вели познатиот писател Ѓерѓ Конрад. Јас би додал: ќе откриете кој лаже и краде ако се уште сте нормален. Пишува Ерол Ризаов

Веќе паднаа најповолните понуди за предвремените парламентарни избори. Во ек е голема распродажба на расипана стока на акшам пазар. На стемнување, кога не се гледа што е здраво, а што чурук, добивате  неверојатен попуст- многу работи за бадијала. Кога ќе ги отворите торбите дома ќе видите колку сте прелажани, но тогаш е доцна синко, резето падна, ни парите ни стоката не можете да ги вратите наредните четири, а можеби и 11 години. Веќе видено, излажано и преживеано повеќе пати во изминатите 30 години слобода, безумие и тиранија.

Еве ги последните понуди од црниот политички пазар на македонските „шибицари“. Ако им дадеме на ВМРО ДПМНЕ гласови за 80 места во парламентот ќе ни го вратат уставното име на државата, идентитетот,  славното минато  и Гоце Делчев жив и здрав и целосно наш. Овој ал’ш вер’ш пазарлак како на Бит Пазар го нуди  Александар Николовски кој лажно се претставува во јавноста како главен човек на ВМРО-ДПМНЕ, кој многу  работи на евроатланските интеграции на Македонија со Европа. Човекот игра на картата на неговиот поранешен шеф Никола Груевски кој, исто така, бараше 80 пратеници за да работи непречено и самостојно за што побрзо  упропастување на државата отколку во една деценија владеење без контрола. Наместо 80 пратеници доби азил во Будимпешта и времено се спаси од затвор.

Менува мадиња за бубрези

Како тоа Николовски, кој инаку е потпреседател на ВМРО-ДПМНЕ ќе ја внесе Македонија во ЕУ со раскинување на Договорите со Грција и со Бугарија  засега е тајна, за да не ја украде власта. Кога ВМРО-ДПМНЕ ќе победи на изборите, ако се случи таква хаварија на државата, Николовски  уште истиот ден ќе ја соопшти генијалната идеја која како и сите генијални работи е многу едноставна и лесна и која веќе ја примени во Грција нивниот пандан  господинот Кирјакос Мицотакис. Само што положи заклетва како премиер на Грција уследи изјавата дека Договорот од Преспа е лош и е против грчките национални интереси, но е непроменлив и Грција ќе го почитува, но ќе бара начини за негова доследна примена и дополнителни отстапки од Северна Македонија додека траат преговорите за членство во ЕУ. 

Претходни колумни од авторот: - Европските, комшиските и домашните шамари

- Чарлиевите ангели поважни од НАТО - Македонците во војна против Македонија

Грција ќе го поддржува својот сосед за членство во ЕУ и во НАТО бидејќи тоа е од национален интерес. Види мајката каде лежел зајакот. Ете на тој евтин трик игра и Николовски, ветувајќи првобитна размена на добра, 80 пратеници за враќање на уставното име и славното минато. Човекот дава  бели бубрези во замена за прави, црни  бубрези. Народот вели  курназ  менува мадиња за бубрези.

Политика на ем шуто ем боде

Да, има уште еден начин да се врати и уставното име на државата и историјата и националниот идентитет и достоинството и гордоста на Македонецот, а тоа е откако ВМРО-ДПМНЕ ќе дојде повторно на власт со апсолутно двотретинско мнозинство да ги отфикари и Грција и Бугарија, ако треба и Косово и Албанија, а зошто не и вековниот непријател на ВМРО  Србија, Европа и Америка, на сите да им кажеме гледајте си ја вашата работа, Македонија останува Македонија за сите времиња. Нашето минато од праисторијата и антиката, од Филлип Втори и Александар Македонски до денес е наше и ничие на друг. Точка крај. Оваа политика на „ем шуто ем боде“ ја имавме 11 години и го видовме тажниот резултат на уништени генерации. На оваа карта, освен неколку редовни пациенти на телевизите во емисиите од типот гласот на народот, црн и бел бумбар сега иновирани како демократски трибини, демек хајд парк, веќе никој не игра освен ВМРО ДПМНЕ. На социјалните мрежи оваа терапија уште дава резултати. 

Разеленување на ВМРО-ДПМНЕ

Втората голема лага како евтина понуда е 50 отсто почист воздух ако ВМРО ДПМНЕ дојде на власт. Со глава и брада ова го вети универзитетски професор со докторска тапија- лидерот на партијата за прочистувањето на загадувањето Христијан Мицкоски. Ваквото раззеленување на ВМРО ДПМНЕ среде зима е врвно научно достигнување кога загаденоста се намалува во проценти со промената на власта. Види мајката што правиме ако ВМРО ДПМНЕ не победи на изборите? Овие од СДСМ ќе продолжат да го трујат народот. Ај некако да го замолиме проф. др Мицкоски да открие како ќе го исчиси воздухот, кога се околу него и околу нас е загадено и на земја и под земја и над земја и во реки и во езера, да не не жртвува ако ги загуби изборите. Професоре дали знаете колку време треба да се исчисти јаловината од Топилницата во Велес и колкава е штетата со години по престанувањето да работи велешката трујачница. Ако не знаете прочитајте ги анализите на академик Ѓорги Филиповски, и ќе видите колку тоа влијае на земјата, на растенијата, на воздухот, на водите и на луѓето и колку време и што се треба да се направи за да се исчисти малку од малку само Велес и велешко. Треба да ви дадеме едно десет мандата за да завршите работа. Затоа дајте малку бидете посериозни кога на проценти делите чист воздух и загаден воздух, па макар биле и во улога на Дедо Мраз пред избори.

Кога ќе го исфрлиме човечкиот отпад?

Секој обид да се подигне свеста за борба против загадувањето и за заштита на човековата околина заслужува секаква поддршка, но сепак треба да се биде доволно при здрава памет да се знае дека тоа што е со децении затруено не се чисти со предизборни кампањи, туку со промена на свеста, со многу работа и со многу пари. Почист воздух вети и СДСМ, ветуват бројни политичари од сите партии кои мислат дека чистењето на воздухот и на човековата околина е само како алишта дадени на хемиско чистење. Такви се, целосно шарлатански, понудите за почист воздух од македонските политичари. Само санкции и казни не се доволни иако се добредојдени. Се виде тоа добро со затворањето и отворањето на Југохром, со озаконетиот  увоз на мртовечките сандаци на четири тркала, кршот од возила, што се трклаат како камикази низ патиштата во Македонија. Се гледа нашиот однос кон загадувањето од оџаците што чурат како пред сто години и со постојано отворениот конкурс за оџачари во 21 век во Македонија. Се гледа и по тоа што ниту една општина не сака уредна депонија, а толерира дива депонија каде што ги гледаме најсрамните слики  на нашата љубов кон човековата средина и кон природата. Колку проценти треба да намалиме од ќумурот, дрвата, автомобилите, камионите, автобусите к’рнтии. Кога ќе проработи одамна изграедниот гасовод, а кога ќе се изгради новиот гасовод, кога ќе научиме кое ѓубре во која канта да го фрлиме. Не мислам само на отпадот што секој ден го исфрламе, туку и на човечкиот отпад што никако да го исфрлиме од употреба, а е најопасен.

Не лажат како млади мајмуни

Можеби најголемата лага која ни ја ветува политиката од првиот ден на независноста и самостојноста, а и пред тоа, е владеењето и на правото и таканаречената правна држава нешто што никогаш не профункционира во изминатите, ќе биде 75 години, во Македонија. Уште не лажат како млади мајмуни со банана дека правдата зависи од судството, од правосудниот систем и не знам од какви други заложби на политичарите. Владеењето на правото зависи од степенот на демократијата, на културата, на образованието и свеста на луѓето. Не може во држава каде корупцијата почнува од малото внимание кога ќе се породи бебето, па до смртта и за  подобро место за погреб, да се инсталира владеење на правото, без процесите на демократизација и европеизација на Македонија и на целиот Балкан. Членството во ЕУ не значи и европеизација, тој процес е многу подолг. Некогаш трае и повеќе од еден век. Во овие три големи лаги е сместена вистината и за селидбите на младите и стручни кадри. Тоа е една од големите предизборни лаги кои ги пласираат нашите политичари во недостиг на идеи како да ја стекнат довербата на неопределените гласачи. Податоците кажуваат дека последните десет години од Македонија заминале над 500.000 граѓани. Тој процес не може да се запре. Може само да се ублажи. Уравниловката во платите која никогаш не е искоренета во Македонија и се одржува со лагата дека сите сме исти, партиската селекција на некадарните на најдобрите места и со највисоки плати, и погоре набројаните ужасни лаги се причините за селидбите колку и да се напрега Влатко Ѓорчев тоа да го смести во партиски води. Демек младите кога се на власт СДСМ си одат од земјата, а кога е ВМРО ДПМНЕ се враќаат. Па нека седне Влатко нека преброи кој колку владеел во овие 30 години па нека пресмета колку заминале, а колку се вратиле.
Неодамна прочитав едно извонредно интервју на писателот Ѓерѓ Конрад во  Капитал. Вели вклучете го телевизорот и ќе ги видите лошите луѓе. Јас би додал: ќе откриете кој лаже и краде ако се уште сте нормален.

 

DW.COM

Реклама