Нова експлозија во Лондон

Повредените имаат во најголем дел изгореници и сместени се во болница. Ниту еден не е тешко повреден или во животна опасност, соопштија спасувачките екипи. Очевидци тврдат дека слушнале силен звук и виделе огнен ѕид во времето на експлозијата. Луѓето во паника бегале од станицата на метрото.

Според Скотланд Јард, експлозијата, која се случила во 08:20 часот во близина на станицата Парсонс Грин, била предизвикана од бомба од рачно производство. На социјалните мрежи претходно кружеше слика од бела канта од која излегуваат жици, каде наводно била поставен експлозивот. Полицијата ја нема потврдено автентичноста на фотографијата.

Британската премиерка Тереза Меј свика седница на кризниот штаб, а министерот за надворешни работи Борис Џонсон ги повика граѓаните да останат мирни. Во Велика Британија во сила е висок степен на предупредување од тероризам. Во четирите напади кои се случија годинава, загинаа 36 лица.