1. Прескокни до содржината
  2. Прескокни до главната навигација
  3. Кон други страници на DW

Меркел: Западниот Балкан го чека долг пат до ЕУ

БГ
13 септември 2021

Земјите од Западниот Балкан имаат уште долг пат пред да станат полноправни членки на Европската Унија, но целта на Германија е да стигнат дотаму, порача германската канцеларка Меркел од Белград

https://p.dw.com/p/40Gn5
Ангела Меркел Александар Вучиќ
Свечен дочек за германската канцеларка во Белград. Фотографија: Oliver Bunic/AFP/Getty Images

Германската канцеларка Ангела Меркел признава дека земјите од Западниот Балкан ги очекува долг пат до членство во ЕУ, но ги охрабрува да продолжат на тој пат. Меркел е вечерва во Белград, каде ја започна прошталната посета на Западниот Балкан со средба со српскиот претседател Александар Вучиќ.

„Знам дека перцепцијата е оти процесот на европските интеграции тече бавно и дека европската страна поставува нови барања, но гледаме низа резултати и гледаме напредок. Внимателно се води сметка да им се поставуваат исти услови на сите држави од Западниот Балкан“, рече Меркел на заедничката прес-конференција со Вучиќ.
Таа наведе дека ЕУ има „голем геостратешки интерес“ сите земји од Западниот Балкан да бидат примени во ЕУ и укажа на опасноста од „влијанија од други региони“ доколку Унијата не делува доволно брзо во некои ситуации.

Меркел ја охрабри Србија „да оди понатаму кон правна држава и плуралистичко општество“ и додаде дека „економските успеси треба да биде показател дека членството во ЕУ е цел која се исплати“. 

Доверлив однос со Вучиќ 

Меркел рече дека низ годините изградила „однос на полна доверба“ со српскиот претседател Вучиќ. 
„Го запознав Вучиќ како личност која не дава лажни ветувања туку секогаш се обидува да го спроведе она што го ветил“, рече Меркел. 

Serbien Belgrad | Angela Merkel, Bundeskanzlerin & Aleksandar Vucic, Präsident
Со Вучиќ изградивме однос на доверба, вели МеркелФотографија: Oliver Bunic/AFP/Getty Images

Од Белград, Меркел ќе продолжи во Тирана каде во вторник ќе се состане со премиерите на останатите пет земји од регионот. Предвидена е и билатерална средба со македонската делегација која ќе ја предводи премиерот Зоран Заев, а ќе биде придружуван од вицепремиерот Никола Димитров и шефот на дипломатијата Бујар Османи.  

Се очекува Меркел да се повлече од политиката по парламентарните избори во Германија закажани за 26 септември годината. Таа мина 16 години на чело на германската влада. 

 

Прескокни го блокот Повеќе на оваа тема

Повеќе на оваа тема