Коронавирус: Турбуленции во турската влада

Претседателот на Турција, Реџеп Таип Ердоган, ја отфлри оставката на министерот за внатрешни работи Сулејман Сојлу, кој сакаше да преземе одговорност поради негативните последици од ненадејната објава за воведување на дводневен полициски час поради сузбивање на коронавирусот.

„Оставката на нашиот министер за внатрешни работи не е прифатена. Тој ќе продолжи да ја извршува оваа функција“, соопшти кабинетот на Ердоган, пренесува новинската агенција Франс прес.

Сојлу синоќа поднесе оставка откако се најде на удар од остри критики поради тоа што во петокот вечер објави дека во 31 град се воведува 48 часовен политички час за време на викендот, два часа пред стапувањето во сила на оваа мерка.

Повеќе:

-Коронавирус: Дали Турција ќе стане нова Италија?

-Коронавирус: новите симптоми и четирите фази на заболување

-Коронавирус: Лажно чувство на безбедност со ракавици за една употреба

Тоа доведе до паника меѓу граѓаните кои масовно се упатија во продавниците. Во набавка тргнаа илјадници луѓе во овие градови, меѓу кои и Истанбул и Анкара, а многумина од нив ги игнорираа правилата за физичко дистанцирање и не носеа заштитни маски кои се задолжителни.

„Одговорноста за спроведување на одлуката за полициски час за време на викендот, чија цел беше сузбивање на епидемијата, исклучиво е моја“, напиша на Твитер Сојлу, еден од највисоките претставници во владата на претседателот Ердоган.

Сојлу (50) за министер е поставен во август 2016 година, а во владеачката Партија на правда и развој премина во 2012 година од Демократската партија. Оттогаш, како што наведува новинската агенција Асошиејтед прес, толку многу напредувал што некои го гледаат како потенцијален наследник на Ердоган и како ривал на министерот за финансии Берат Албајрак, зет на турскиот претседател.

Воведувањето на полицискиот час за време на викендот во Турција изненади многумина, бидејќи земјата претходно имаше поопуштен пристап во борба против коронавирусот во однос на нејзините соседи во Европа и на Блискиот исток.Пред воведувањето на полицискиот час за сите, движењето беше забрането за младите од 20 години и за постари од 65. Во Турција се потврдени речиси 57.000 случаи со коронавирус, а починаа 1.198.