Ковачевски: Нема отстапки во преговорите со Бугарија | Северна Македонија | DW | 18.05.2022

Посети ја новата страница на DW

Погледнете ја бета-верзијата на dw.com. Сѐ уште не сме готови! Вашето мислење може да ни помогне да ја направиме подобра!

  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Реклама

Северна Македонија

Ковачевски: Нема отстапки во преговорите со Бугарија

Според премиерот, европската интеграција на Северна Македонија и Албанија е заложник на Софија. Сакаме достоинствено решение, а не уцени - порача тој.

Европската интеграција на Северна Македонија и Албанија е заложник на Бугарија. Нема да правиме отстапки во преговорите - решението мора да се заснова на европските вредности, а тоа значи дека мора да е засновано на меѓусебно почитување меѓу политичарите, институциите и граѓаните на државите. Ваква порака испрати денеска премиерот Димитар Ковачевски кој учествуваше на самитот Македонија 2025, а имаше и прес-конференција со српската колешка, Ана Брнабиќ, која што е во посета на Скопје.

„Сакаме достоинствено решение. Имаме декларација во Собранието прифатена од парламентарните партии, која што е основата за нашиот преговарачки тим во овој спор. Решението мора да биде прифатливо за двете држави и за добро на регионот“, рече Ковачевски.

Премиерот на конференцијата во организација на Македонија 2025 рече дека европската интеграција на земјата е сведена на зборување за историја, што практично сите земји од Европската Унија го оправдуваат. „Според мене, тоа е погрешно, бидејќи кога се зборува за историја, не се ветува ништо, туку само се зборува за нешто што се случило пред 100-150 години. Тоа е класична уцена и не може да произведе никаков бенефит за никого. Затоа сметам дека зборувањето за теми коишто ја засегаат иднината на државата се многу значајни и на таква основа треба да се водат сите разговори“, рече Ковачевски.

-повеќе на темата: Османи: Притисокот е фокусиран на Бугарија, има обиди за провокација и блокада

Српската премиерка, Ана Брнабиќ нагласи дека Србија искрено ја поддржува РС Македонија на нејзиниот европски пати. „Дури и во разговорите за нашето приклучување во ЕУ секогаш им укажуваме на нашите европски партнери од колкаво значење е за целиот регион да се забрзаат евроинтеграциските процеси на Албанија и на С Македонија бидејќи тоа ќе даде позитивен сигнал за развој на целиот регион на Западен Балкан“, рече Брнабиќ.