Иванов контра Заев: премиерот ја манипулира јавноста | Северна Македонија | DW | 12.06.2018
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Реклама

Северна Македонија

Иванов контра Заев: премиерот ја манипулира јавноста

Шефот на државата Ѓорге Иванов денеска преку соопштение го обвини премиерот Зоран Заев дека ја манипулира јавноста и ги „наведува“ граѓаните. Иванов го критикува Заев дека е несериозен и неодговорен

Mazedonien - Gjorge Ivanov - Albanisch zweite Amtssprache (picture alliance/AP Photo/D. Vojinovic)

Изјавата на Иванов се случува во чувствителен момент додека се очекува разговорот меѓу Ципрас и Заев

Претседателот Иванов ја смета за манипулативна изјавата на премиерот Заев дадена во синоќешното интервју на телевизија Телма во која тој оцени дека евентуалното отфрлање на договорот со Грција ќе ги загрози перспективите на Република Македонија за влез во ЕУ и НАТО и ќе ги зголеми внатрешните опасности.

Оваа изјава, вели Иванов, „претставува очаен обид за манипулација на јавноста и наведување на македонските граѓани во пресрет на евентуално референдумско изјаснување“.
Иванов инсистира на решение на спорот без промена на Уставот, односно во согласност со него.

„Склучувањето на меѓународен договор содржан во еден или повеќе поврзани меѓусебни документи треба да биде во согласност со Уставот на Република Македонија, а не да предвидува негова измена“, се наведува во соопштението од неговиот Кабинет.

Изјавата на Иванов се случува во чувствителен момент додека се очекува вториот телефонски разговор на грчкиот и македонскиот премиер Алексис Ципрас и Зоран Заев во последните 24 часа од кој треба да произлезе конечен одговор дали владите се согласиле за договор за решавање на спорот за името.

Претседателот на државата остро ја критикува и праксата на телефонски разговори меѓу двајцата премиери.

Иванов смета дека е „несериозно и неодговорно прашањето за името, кое е исклучително важно прашање за граѓаните на Република Македонија, и наметнати технички барања, да се решаваат телефонски и по пат на личен договор меѓу премиерите на двете држави“.

 

DW.COM

Реклама