Загриженоста на Берлин резултира во директен ангажман во Македонија | Северна Македонија | DW | 04.05.2016
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Реклама

Северна Македонија

Загриженоста на Берлин резултира во директен ангажман во Македонија

Официјален Берлин повлече многу значаен политички потег со одлуката да именува специјален пратеник во Македонија. Загриженоста за земјата е главна причина за именувањето на Хајндл

Германија одлучи да го стави својот политички габарит на располагање во обид да се изнајде решение за длабоката политичка криза во Македонија. Именувањето на Јоханес Хајндл (насловна фотографија) за специјален пратеник во Македонија треба да даде дополнителен импулс за изнаоѓање излез од кризата.
Портпаролот на германското Министерство за надворешни работи, Мартин Шефер вели дека одлуката била поттикната од загриженоста во Берлин за состојбата.
„Внатрешнополитичката состојба во Македонија се уште и предизвикува голема загриженост на германската влада. Излез од многу тешката и длабока внатрешнополитичка криза досега не е на повидок“, вели Шефер.
„Од тие причини, министерот за надворешни работи Франк-Валтер Штајнмајер одлучи да именува специјален пратеник за состојбата во Македонија“.
Штајнмајер го замолил амбасадорот Јоханес Хајндл, кој во моментов ја предводи дипломатската мисија во Виена, Австрија, да ја преземе оваа функција.
Шефер не открива кога Хајндл може да се очекува во Македонија, но најавува тесна соработка со партнерите кои се веќе во земјата.
„Амбасадорот Хајндл веднаш ќе започне тесно да соработува со Европската Комисија, со САД и со други партнери, и ќе дава поддршка во нивното посредување за надминување на внатрешнополитичката криза“.
Според портпаролот, ваквата одлука на шефот на дипломатијата Штајнмајер ја одразува и заложбата на германската влада за Западниот Балкан.
„Особено во поглед на европската перспектива која ја имаат сите земји од Западниот Балкан, како и во однос на интеграцијата во евро-атлантските структури“, вели портпаролот на германското МНР, Мартин Шефер.

Загриженост за демократијата
Поранешниот македонски амбасадор во САД и Холандија, Никола Димитров оценува дека со ваквиот чекор, Германија покажала оти е многу заинтересирана за демократијата во земјата.

Nikola Dimitrov ehemaliger mazedonischer Botschafter

Правдата има свој сојузник во Берлин, вели Никола Димитров.


„Со овој чекор Германија покажува дека се грижи за демократијата и владеењето на правото во Македонија и најавува дека кон решавањето на кризата ќе пријде со целата своја тежина и внимание“, смета Димитров.
„Правдата очигледно има свој сојузник во Берлин“, заклучува поранешниот амбасадор кој во моментов е член на Хашкиот Институт за правда.
Јоханес Хајндл е дипломат со богато искуство и важи за голем познавач на Балканот. Во речиси 30-годишната дипломатска кариера работел и во германската амбасада во поранешна Југославија, а подоцна го предводел и одделот за Западен Балкан во германското МНР. Функцијата специјален пратеник за Македонија, Хајндл ќе ја врши паралелно со својата актуелна амбасадорска позиција во Австрија. 60-годишниот поранешен новинар се очекува деновиве да пристигне во Скопје.

DW.COM

Поврзана содржина

Реклама