1. Прескокни до содржината
  2. Прескокни до главната навигација
  3. Кон други страници на DW
Медиуми

ДВ: Неприфатливо жигосување на новинари во Хрватска

1 јуни 2019

Медиумската куќа Дојче веле најостро ги осудува објавените „потерници“ за германски и за австриски новинари (меѓу кои има и соработници на ДВ) во еден хрватски весник - поради нивното критичко известување за Блајбург.

https://p.dw.com/p/3Jawv
Gedenkveranstaltung kroatischer Nazi-Einheiten in Österreich
Фотографија: picture-alliance/dpa/APA/G. Eggenberger

Десно-националниот „Хрватски тједник“ во своето издание од 23 мај 2019 година на насловната страна објави фотографии на пет новинарки и новинари кои известуваа за комеморацијата во австриски Блајбург на која се собираат и десничарски екстремисти. Авторот на текстот претставниците на медиумите ги нарече непријатели на Хрватска, се наведува во соопштението на Дојче веле.

„Хрватски тједник“ со имињата на новинарите ги наведе и медиумите за кои работат - Тања Мале (А1), Среќко Матиќ (ДВ), Оливера Стајиќ (Стандард), Крсто Лазаревиќ (Велт, ДВ, Републик) и Даниел Мајиќ (Франкфуртер рундшау).

Истовремено, петмината ги етикетираше како дел од „скоевската интернационала“ која во Германија и во Австрија делува против Хрватска, но „не успеала да ја спречи блајбуршката комеморација“.

Двајцата соработници на Дојче веле се изложени на вистинска хајка на социјалните мрежи и во повеќе наврати многу јасно им се закануваа. Еден од споменатите новинари во Блајбург е и нападнат, вербално и физички. Била потребна интервенција од австриската полиција за да се спречи и нешто полошо.

Во врска со нападите врз новинарите, а особено во врска со објавувањето на нивните фотографии во стил на потерници, генералниот директор на Дојче веле, Петер Лимбург, изјави: „Јавното жигосување на нашите колешки и колеги е неприфатливо. Задача на новинарите е да информираат. Известувањето, како во овој случај, за десно-радикалните тенденции среде Европа е обврска. Ваквото објавување (фотографии на новинарите) може да се оцени како опасна закана за новинарите и претставува напад врз слободата на медиумите - напад на кој ние сите заедно одлучно мораме да му се спротиставиме.“