Грција: Задолжителна вакцинација за здравствените работници

Здравствените работници во Грција ќе бидат суспендирани од работа доколку одбијат да се вакцинираат согласно новите правила кои ги најави грчкиот премиер Кирјакос Мицотакис.
Вработените во домовите за нега ќе бидат суспендирани доколку не закажат вакцинација до 16 август годинава, а од септември истото ќе важи и за сите вработени во државното и приватното здравство.
Од петок, 16 јули, до крајот на август, само вакцинирани лица ќе смеат да влегуваат во објекти од затворен карактер како барови, кина, театри или шопинг центри.

„По една и пол година, никој повеќе не може да тврди дека не знае за вирусот. Не можеме да дозволиме земјата повторно да се затвори поради однесувањето на некои луѓе. Не е во опасност Грција, туку невакцинираните Грци“, рече Мицотакис.

Од крајот на јуни повторно растат бројките на новозаразени во земјата, делумно поради невнимателноста на граѓаните, а дел и поради новата Делта варијанта. Нешто повеќе од 40% од граѓаните досега се целосно вакцинирани, но интересот кај останатите опаѓа последниве недели. Од четврток ќе можат да се вакцинираат и малолетници над 14 години со согласност од нивните родители.
Мицотакис рече дека „99% од оние кои се на интензивна нега не се вакцинирани“. Грчкиот премиер најави дека вакцинацијата ќе биде задолжителна и за воените регрути.