Вашингтон се „утврдува“ за инаугурацијата на Бајден

По насилниот упад во Капитолот од страна на радикалните приврзаници на претседателот на САД во заминување Доналд Трамп во минатата среда, растат стравувањата дека инаугурацијата на неговиот наследник Џо Бајден исто така може да биде засенета од безредија и насилство.

Федералното истражно биро (ФБИ) објави предупредување дека постои можност вооружени учесници да одржат протести во Вашингтон во деновите пред инаугурацијата на избраниот претседател Џозеф Бајден на 20 јануари.

Предупредувањето се однесува и за главните градови во сите 50 сојузни држави ширум Америка, објави агенцијата Ројтерс, повикувајќи се на неименуван извор од Федералната агенција за примена на закони.

Повеќе:

-Доналд Трамп се соочува со обвинение за „поттикнување востание“

-Трамп, оди си од политичката сцена!

-Американската демократија го преживеа Доналд Трамп

Истовремено, по насилството минатата среда кое се случи во комплексот Капитол хил, кој беше под опсада од симпатизерите на претседателот во заминување Доналд Трамп, Националната гарда во Вашингтон ќе испрати 15.000 припадници. Исто така, ќе бидат забранети туристички тури во областа кај споменикот на Џорџ Вашингтон, еден од симболите на градот.

Истиот извор, кој инсистирал на анонимност, изјавил дека предупредувањето на ФБИ се однесува на периодот од 16 до 20 јануари за главните градови на американските сојузни држави и за најмалку уште три дена по инаугурацијата во Вашингтон.

Шефот на бирото на Националната гарда, Даниел Хокансон, изјави дека очекува 10.000 припадници од оваа формација да бидат во Вашингтон до сабота. Тие ќе бидат ангажирани во областите безбедност, логистика и комуникација. Хокансон изјави оти нивниот број би можел да се зголеми до 15.000. 

Сенаторот Крис Марфи, кој вчера му се обрати на вршителот на должноста секретар за одбрана, изјави дека не е јасно дали Националната гарда ќе биде доволна за заштита или за тоа ќе бидат потребни активни трупи.