Бучковски: До крајот на годинава ќе најдеме решение со Софија | Северна Македонија | DW | 03.03.2021
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Реклама

Северна Македонија

Бучковски: До крајот на годинава ќе најдеме решение со Софија

Мојата главна преокупација во последните неколку недели е соработката во медиумската сфера, универзитетите, културата, и да се пофалам - имаме сериозно голем напредок, вели Бучковски.

Таму избори, овде попис - темите кои вообичено се користат за политизации од секаков вид, дополнително ја кренаа и онака покачената температура меѓу Софија и Скопје. Во така зовриена ситуација, особено тешка изгледа задачата на специјалниот претставник на македонската Влада за Бугарија, Владо Бучковски. Но, спротивно на претпоставките, тој рефлектира силен оптимизам дека за сите спорни прашања ќе се најде решение.

„Јас по природа сум оптимист, и верувам дека до крајот на мојот мандат, (декември оваа година - н.з.) ќе најдеме решение за отворените прашања. Се наоѓаме во фаза на предизборие во Бугарија, затоа се обидуваме да бидеме претпазливи. Мојата главна преокупација во последните неколку недели е соработката во медиумската сфера, универзитетите, културата“, вели Бучковски.

На тој план, потенцира дека има одлична соработка со бугарскиот амбасадор Ангелов, и најавува почеток на многу идни соработки.

„Да се пофалам, имаме сериозно голем напредок, пред се' заради големата посветеност на директорот на БНТ, Емил Кошлуков и неговиот тим, на директорот на БТА, Кирил Влчев во Софија, но и овде во Скопје исклучителен беше ангажманот на Македонскиот телеком (директорите Љушев и Станчев) за да стартува во рекордно брзо време БНТ на МаксТВ (вечерва), на директорот на МРТВ, Цветковски, во усогласувањето на текстот на договорот за соработка со БНТ, и на директорот на МИА, Антоновски, за соработката со БТА. Ректорот на Софискиот универзитет, Герџиков, со пет декани набрзо доаѓа во Скопје. Со ректорот на УКИМ, Јанкуловски, и со декани од повеќе наши факултети, ќе договараат конкретни проекти. За координација на овие активности постојано сум на релација Скопје-Софија-Скопје. Привршуваат активностите за влезот на Универзитетот од Велико Трново во заеднички студиски програми на Славјанскиот универзитет во Свети Николе. Тоа се дел од мерките за градење на доверба“, објаснува Бучковски.                                   

Активности со изборен шмек

Но, за ништо да не биде едноставно, атмосферата ја наелектризира состанокот на бугарскиот претседател Румен Радев со шефовите на безбедносните служби, „заради заштита на правата на бугарските граѓани во странство", односно во Северна Македонија. Македонскиот претседател Пендаровски и премиерот Заев таа средба ја оценија како спротивна на основниот принцип во меѓународната политика за немешање во внатрешните работи на друга држава.

Гледај видео 26:25

Интервју Зоран Заев: Голема е горчината што нашите пријатели ни ставија блокада

Истото го посочува и Бучковски.

„Координацијата на претседателот Радев со раководителите на безбедносните служби на тема Македонија, за наводната загрозеност на нашите сограѓани кои се декларираат како Бугари, е недозволиво мешање во нашите внатрешни работи. Ние сме сојузници во НАТО и како сојузници ни личи да работиме заедно, а не едни против други. Сепак, јас на ова гледам во контекст на изборите во Бугарија на 4-ти април, но и во пресрет на пописот кој кај нас почнува на први април. Да се потсетиме дека Културниот центар'Иван Михајлов' од Битола, (кој му пишуваше на Радев за нивната загрозеност во Македонија, н.з.) бараше промптно добивање на бугарско државјанство за сите оние кои ќе се изјаснат за Бугари на пописот што следи кај нас“, посочува Бучковски.                               

Другата дебата ја предизвика предлогот од пет точки што го даде поранешниот македонски премиер, Љубчо Георгиевски, уверен дека со него може да се запре движењето на македонското-бугарските односи кон нов ќорсокак и нова ескалација. Многумина предлогот го отфрлија „на прва топка“, како штетен. Бучковски смета дека треба да се цени секој напор за наоѓање решенија, но вели дека предлогот на Георгиевски не ја одразува владината стратегија.  

„Старо-новите тези на Љубчо Георгиевски се негов личен напор да помогне во изнаоѓање на решенија за деблокада. Тие не се координирани со Владата и не се одраз на нашата стратегија. Имаме кристално јасна позиција за нашиот идентитет и нашиот македонски јазик, подготвени сме за разговори по изборите во Бугарија за отворените прашањаоколу краткото и долгото име на нашата држава, немешањето во внатрешните работи и систематските мерки против говорот на омраза“, вели Бучковски.

Родствена блискост, иста крв

Предлог-точките на Љубчо Георгиевски му се допаднале на Бугарското здружение на македонски родови, кое себеси се смета за модерно продолжение на вековната традиција на организирање на бегалци од Македонија кои емигрирале во слободната бугарска држава. Здружението се легитимира како патриотска организација што обединува потомци на родовите во кои израснале истакнати македонски писатели и револуционери како Кузман Шапкарев, Борис Дрангов, Мише Развигоров, Тодор Александров и многу други.

„Со загриженост ги следиме најновите јавни коментари во братската Република Северна Македонија на конструктивните идеи и предлози на поранешниот премиер Љубчо Георгиевски за надминување на историските и политичките недоразбирања меѓу нашите две земји", наведува здружението, потенцирајќи дека тие реакции во голема мера наликуваат на јавниот линч на кој бил подложен професорот Денко Малески во пролетта 2020 година.

Mazedonien Ljubco Georgievski Präsident der VMRO-NP-Partei

Предлог-точките на Љубчо Георгиевски му се допаднале на Бугарското здружение на македонски родови

Од Здружението со горчина констатираат дека секој обид за приближување помеѓу двете соседни земји преку враќање во реалната историја, наидува на жесток отпор од влијателните структури во Северна Македонија, што го го сметаат за продолжение на методите на Студената војна и подготвување на општеството да се однесува во непријателски дух кон Бугарија.

„Би сакале да потенцираме дека секогаш категорично ќе се спротивставуваме на изопачувањето на историските факти и на создавањето омраза меѓу луѓето со една и иста крв. Каква смисла има да се негираат очигледните и лесно проверливи факти дека сите македонски револуционерни организации во османлискиот период го имале бугарскиот стандарден јазик и писмо за свој официјален? Или, пак, дека Гоце Делчев и Даме Груев и многу други револуционери од таа епоха биле учители на Бугарската егзархија и предавале бугарски литературен јазик?“, се вели во соопштението.

Од Здружението најавуваат дека ќе се спротивстават на јазикот на поделба и омраза и ќе работат на зачувување на родствена блискост што постои меѓу граѓаните на Бугарија и Северна Македонија.

Поврзана содржина

Реклама