Бејрут наликува на апокалиптична воена сцена | Свет | DW | 05.08.2020
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Реклама

Свет

Бејрут наликува на апокалиптична воена сцена

Бејрут уште долго ќе се опоравува од страотната експлозија која одекна во вторникот и која однесе над 130 човечки животи. Земјата притисната од економски и политички проблеми сега се соочува со нов предизвик.

Меѓу граѓаните на Бејрут кои успеаја да ја преспијат минатата ноќ, многумина се разбудија во средата соочени со траумата и бесот поради страотната експлозија која го потресе градот. Либан е веќе среде хиперинфлација, растечка пандемија на коронавирус и огромна сиромаштија.
Експлозијата, која според либанските власти ја предизвикале 2,700 тони амониум нитрат складирано на пристаништето, уништи дел од главниот градот и однесе стотици човечки животи.

Гледај видео 00:25

Страотната експлозија во Бејрут од повеќе агли


Фред Бтеич, хирург кој за малку го избегнал ударот на експлозијата, сцените од минатата ноќ ги опишува како „апокалиптична, воена сцена“, со огромен број пациенти кои пристигнале во итната служба на болницата во која работи.
„Некои луѓе кои ги опериравме, не им ги знаевме ниту имињата, ниту кои беа, ниту дали имаа роднини. Видовме ужасни работи“, вели Бтеич за ДВ. „Опериравме луѓе кои, технички, веќе беа мртви само за да им мине редот, а имаше деца на возраст од 4 или 5 години. Мислам дека ќе имаме многу повеќе жртви“, вели тој.
Амониум нитратот може да има „ужасен ефект врз човечкото тело, а последиците ќе ги гледаме и за неколку години“, вели Бтеич. Делови од градот се практично уништени. „Личи како Хирошима“, вели хирургот.
Многу семејства кои живееја во близина на експлозијата останаа без своите домови, отворајќи нов проблем. Според градоначалникот на Бејрут, Марван Абуд околу 300,000 луѓе останале без кров над глава.

Libanon | Beirut | Gewaltige Explosion am Hafen (Getty Images/AFP/I. Amro)

Повредени граѓани на улиците на Бејрут чекаат лекарска помош


Некои жители на социјалните мрежи им нудат сместување на своите сограѓани, додека хотелиерите ги постираат своите телефонски броеви под хаштагот "#ourhomesareopen" (нашите домови се отворени).

Политички хаос

Иако за многумина е прерано да размислуваат за влијанието кое експлозијата ќе го има врз нивните животи, аналитичарите велат дека бесот кон одговорните ќе предизвика голем политички потрес.
„Очекувањата се дека после ова, кога ќе почне истрагата за тоа кој е одговорен, тоа ќе произведе нов хаотичен проблем затоа што нема речиси никаква доверба меѓу либанските граѓани и властите“, вели дописникот на ДВ од Бејрут Разан Салман. „Ова е дополнение на економската криза во која се наоѓа Либан од октомври“.
Пред експлозијата, во Либан се очекуваше пресудата на меѓународното судење против осомничените убијци на поранешниот премиер Рафик Харири. Пресудата ќе создадеше дополнителни политички тензии во земјата која веќе врие од незадоволство и протести против секташката политика и корумпираните политичари. Но, пресудата во меѓувреме беше одложена за 18 август.. 


„Никој не размислуваше за тоа во моментов“, вели Салман. „Сите се се уште во шок, во панија. Мислам дека никој не размислува за пресудата повеќе“.
Дали ова може да биде моментот за единство и обединување на граѓаните на Либан, останува отворено прашање.
„Не ми е гајле што се крие зад ова, дали е несреќа, намерно или политички предизвикано- загубите кои ги претрпевме се колосални и не очекувам Бејрут наскоро да се опорави од ова“, вели Бтеич.

DW.COM

Реклама