„Бетмен“ во притвор, за имунитетот на пратениците ќе се одлучува попладнево | Македонија | DW | 29.11.2017
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Македонија

„Бетмен“ во притвор, за имунитетот на пратениците ќе се одлучува попладнево

Судот му одреди притвор и на Богдан Илиевски, еден од организаторите на протестите на „За Заедничка Македонија“. За имунитетот на пратениците попладнево треба да одлучува надлежната собраниска комисија.

Досега вкупно шест лица, меѓу нив и поранешниот министер за внатрешни работи и директор на БЈБ, Митко Чавков добија 30 дневен притвор во судот во Скопје. Последен во низата, според агенцијата Макфакс, е Богдан Илиевски алијас „Бетмен велит“, актуелен член на Извршниот комитет на опозициската ВМРО-ДПМНЕ, и еден од главните организатори на протестите кои завршија со насилничкиот упад во Собранието на 27 април годинава. Меѓу притворените е и оперскиот пејач Игор Дурловски. На две лица им е одредена мерка домашен притвор.

Во Собранието се очекува враќањето на претседателот Талат Џафери, а потоа треба да се одржи седница на Комисијата за деловнички и мандатно-имунитетни прашања која треба да расправа по барањето на судот за одземање на пратеничкиот имунитет на шест пратеници: Крсто Мукоски, Сашо Василeвски, Јохан Тарчуловски,  Жаклина Пешевска и Љубен Арнаудов од ВМРО-ДПМНЕ и Љупчо Димовски од Социјалистичката партија.

Гледај видео 01:45

Се редат притвори за упадот во Собранието

Сите шестмина се дел од предметот на Јавното обвинителство за упадот во Собранието. Обвинети се за терористичко загрозување на уставниот поредок и безбедноста, согласно членот 313 од Кривичниот законик.

Комисијата треба да донесе одлука со мнозинство гласови, а истата потоа треба да ја потврди и Собранието со мнозинство од 61 пратеник.

Десетина приврзаници на ВМРО-ДПМНЕ до рано утрово останаа пред седиштето на Основниот суд Скопје 1, протестирајќи против приведувањето на осомничените за упадот во Собранието. Денеска пред судот е мирно.

 

DW.COM

Аудио и видео прилози на оваа тема

Реклама