Барселона на нозе - се бара ослободување на Пуџдемон | Свет | DW | 26.03.2018
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Реклама

Свет

Барселона на нозе - се бара ослободување на Пуџдемон

По апсењето на поранешниот каталонски претседател Карлес Пуџдемон во Германија, десетици илјади луѓе во Барселона излегоа на протести и бараа негово ослободување. Во текот на демонстрациите дојде до судири.

„Ослободете го нашиот претседател. Не бидете соучесници“ - стоеше на плакатите кои ги носеа учесниците на протестниот марш во Барселона. Според полицијата, на протестите вчера излегоа околу 55.000 луѓе. Меѓу приврзаниците на лидерот на сепаратистите и безбедносните сили постојано имаше судири. Полицијата испука предупредувачки куршуми во воздух и употреби палки за да ги потисне демонстрантите. Според наводи на здравствените власти, во текот на протестите се повредени речиси 100 лица, од кои 23 се полицајци. Уапсени се четири лица.

Демонстрантите со пароли како „Ослободување на политичките затвореници“, маски со ликот на Пуџдемон и знамиња на независност, маршираа од пред претставништвото на Европската Комисија до германскиот конзулат во Барселона.

Barcelona Deutsches Konsulat Protest Puigdemont Verhaftung (Getty Images/AFP/J. Lago)

Демонстрантите залепија знак со барање „Ослободете го нашиот претседател“ на зградата на германскиот конзулат во Барселона

Вицепретседателот на каталонскиот парламент Жозеп Коста оцени дека шпанскиот налог за апсење на Пуџдемон е политички мотивиран. Коста за ДВ изјави дека се надева оти Пуџдемон нема да биде испорачан.

Портпаролката на листата на која припаѓа Пуџдемон - „Заеднички за Каталонија“, Елза Артади, на Твитер напиша: „Шпанија не гарантира фер процес, туку се занимава со одмазда и угнетување.“

Spanien Barcelona Demonstration nach Inhaftierung von Puigdemont (Reuters/A. Gea)

Марш на десетици илјади луѓе во Барселона со барање за ослободување на Карлес Пуџдемон

Врховниот суд во Шпанија во петокот отвори кривични постапки против Пуџдемон и други 12 регионални политичари. Против седуммина сепаратисти кои побегнаа во странство се издадени нови налози за апсење, меѓу нив и против Пуџдемон. Тој во татковината е соочен со затворска казна до 30 години.

Повеќе:

Шпанија ќе ја активира потерницата по Пуџдемон

Пуџдемон сака да управува со Каталонија од егзилот во Брисел

Пуџдемон беше уапсен вчера попладне во германската покраина Шлезвиг Холштајн додека од Данска патувал за Белгија, каде живее во егзил. Според извештај на „Килер нахрихтен“ информацијата за Пуџдемон Германската криминалистичка служба (БКА) ја добила од финските безбедносни власти. Магазинот „Фокус“ пак пишува дека шпанската тајна служба го има Пуџдемон постојано „на око“ и дека таа ја информирала БКА за неговите планови за патување.

Пуџдемон денеска треба да биде изведен пред суд во Шлезвиг Холштајн заради утврдување на идентитетот. Според обвинителот Ралф Депер, шпанските власти би требало да поднесат документи во кои ќе изнесат причини за испорака на Пуџдемон, а судот потоа ќе одлучи дали испорака во Мадрид е правно издржана. Доколку не постојат правни пречки за тоа, работата во свои раце ќе ја преземе генералното обвинителство во Шлезвиг Холштајн, изјави Депер.

DW.COM

Реклама