Јанукович бара трговски преговори со ЕУ

Европската унија ги повика денеска властите во Украина да покажат крајна воздржаност по жестоките судири за време на викендот меѓу полицијата и демонстрантите кои се незадоволни поради отфрлањето на договорот за асоцијација со Унијата. Според претседателот на Европскиот парламент, Мартин Шулц, украинските државни власти не само што ги игнорираат барањата на многу свои сограѓани, туку и ги задушуваат со пендреци и солзавец кога во очај изразуваат надеж на улица.

Седиштето на Владата во Киев денеска беше опколено од демонстранти кои бараат оставка на Виктор Јанукович и нови избори. Портпаролот на Парламентот на Украина Володимир Рибак изјави дека утре пратениците ќе го разгледаат барањето од опозицијата за гласање недоверба на Владата.

Претседателот на Европската Комисија, Жозе Мануел Барозо побара од властите во Киев да го почитуваат правото на мирен протест и да отворат дијалог со релевантните политички сили во земјата.

На вчерашните протести во главниот град на Украина, на кои учествуваат повеќе од 100 илјади луѓе, дојде до жестоки судири со полицијата во кои беа повредени повеќе од 100 луѓе, откако демонстрантите се обидоа да влезат во зградата на претседателот. Бројот на демонстрантите денеска е далеку помал, и изнесува околу 5.000 луѓе.

Претседателот Јанукович денеска телефонски разговарал со Барозо и од него побарал да прими украинска делегација на разговори околу некои аспекти од Договорот за асоцијација и слободна трговија. Барозо го прифатил барањето и изразил подготвеност да се разговара „за некои аспекти кои се однесуваат на досега иницираните договори“, но не и да се отвораат нови преговори.