1. Прескокни до содржината
  2. Прескокни до главната навигација
  3. Кон други страници на DW

Штајнмајер: Гастарбајтерите ја градеа економијата

БГ/ ДПА
28 септември 2021

Во Германија започна одбележувањето на 60 годишнина од договорот со Турција кој овозможи доаѓање на милиони ткн. „гости работници“ за да се пополнат дупките на пазарот на трудот.

https://p.dw.com/p/40yWm
Deutschland | Steinmeier im Gespräch mit Bürgern mit türkischen Wurzeln
Германскиот претседател Франк Валтер ШтајнмајерФотографија: Christoph Soeder/dpa/picture alliance

Претседателот Франк-Валтер Штајнмајер им изрази почит на бројните постигнувања на луѓето со мигрантско потекло при посетата на индустрискиот центар на земјата во регионот на Рур.

„Стотици илјади луѓе од Турција помогнаа да се изгради економијата во еден динамичен период, во време кога имаше недостаток на работна сила во Германија. Луѓе кои, низ годините, ја направија нашата земја по разновидна и отворена, и секако економски посилна“, рече Штајнмајер на почетокот на посетата на градот Мулхајм. 

Придружуван од сопругата Елке Биденбендер, Штајнмајер ја посети челичната леарница Фридрих Вилхелмс-Хуте. Околу 45 отсто од работници во неа имаат имигрантско потекло, а многумина се втора или трета генерација наследници на „гастарбајтерите“ кои дојдоа во Германија на почетокот на 1960-те години. 

„Долго време, работата беше главен интеграциски фактор“, рече Штајнмајер во разговор со раководството и работниците.

Во 1950-те Германија потпиша неколку работни договори со Италија, Шпанија и Грција за да го надополни недостатокот на работници по Втората светска војна. Но тоа не беше доволно за да се одржи високото темпо на раст на германската економија, па на 30 октомври 1961, беше потпишан таков договор и со Турција. Тој важеше се до 1973 година. 

Во тој период, околу четири милиони гости-работници и нивни семејства пристигнаа во земјата, повеќето во регионот на Рур и околу градовите Есен, Дортмунд и Диселдорф. Околу два милиони останаа да живеат во Германија.