Хрватска „чесно“ ќе и‘ помогне на Србија

Средбата меѓу двајцата премиери вчера (16.01) траеше два часа зад затворени врати. Подоцна на работниот ручек кон нив се придружија вицепремиерот Расим Љајиќ и хрватскиот заменик-министер за надворешни работи Јошко Клисовиќ. На заедничка прес-конференција по средбата Дачиќ рече дека разговарале за ЕУ, за економската соработка и за сите нерешени прашања, во кои „нема ништо ново и сите потекнуваат од 90-те години“ - бегалците, воените злосторства, исчезнатите лица, границите, жалбите, пензиите, имотот на претпријатијата, наследството од поранешна Југославија.

„Има многу прашања, по кои мислењата не ни се совпаѓаат, има и емотивни прашања, но знаеме дека треба да соработуваме. Се зборува дека средбата е организирана под притисок на Брисел, но сметам дека Брисел е изненаден дека средбата се оствари толку брзо“, рече Дачиќ.

Зоран Милановиќ, кој беше иницијатор на средбата со Дачиќ, рече дека таа можела да се организира и порано, но имало извесни пречки.

„Тука сум за да видам дали може да биде подобро. Минавме низ тежок период, а тоа само докажува дека политиката е не само разум, но и чувство. Нема ништо ново, освен дека изгубивме половина година, а зошто, сега не е важно“, рече Милановиќ, истакнувајќи дека односите меѓу Загреб и Белград се важни не само за двете земји, туку и за регионот.

Милановиќ вети дека Хрватска ќе и‘ помогне „чесно“ на Србија во нејзината интеграција во ЕУ и без задни мисли ќе даде се‘ од себе си. Српскиот претседател Томислав Николиќ рече дека пред посетата на Милановиќ требало да се сретнат претседателите на двете земји.

„Не ми е јасно зошто Иво Јосиповиќ избегна средба со мене. Јас сум човекот кој ја претставува Србија и нејзините граѓани во земјата и во странство“, рече Николиќ.