Снежниот хаос ја прекина работата на авто-концерните во Јапонија

Силните снежни наноси во Јапонија се одразија и врз автомобилската индустрија. Автомобилските концерни „Тојота“, „Хонда“ и „Сузуки“ ја прекинаа работата во вкупно девет фабрики во центарот и истокот на земјата. Делумно поради тоа што доставувачите не можеле да испорачаат делови, како и поради тоа што работниците воопшто не можеле да дојдат до работното место, соопштија претпријатијата.

„Тојота“ поради недостиг на составни делови затворила четири фабрики, во кои меѓу другото се произведуваат и моделите „Тојота Приус“ и „Корола“. „Хонда“ уште во петокот ја запрела работата во две фабрики, додека „Сузуки“ ја прекина работата во три свои фабрики.

Во снежниот хаос кој со денови трае во Јапонија животот го загубија досега 19 луѓе, а повеќе од 1.600 лица се повредени. Од петокот стотици возачи на автомобили во провинцијата Нагано се заглавени на завеаните улици. Авионскиот и железничкиот сообраќај во Јапонија се одвива отежнато.