Сите треперат од изборите, само Меркел не!
20 јануари 2013Кандидатот за канцелар на Социјалдемократската партија, Пер Штајнбрик, вели дека покраинските избори во Долна Саксонија за него „се разбира дека имаат огромна улога“. Предизвикувачот на канцеларката Ангела Меркел на наредните сојузни парламентарни избори чезнее по зајакнување што овие избори можеби би му го донеле. Се чини долго време Долна Саксонија даваше ваква поддршка пред сојузните парламентарни избори. СПД и Зелените беа во водство. Но, водството во истражувањата на јавното мислење со текот на времето се стопи и сега се покажува трка рамо до рамо со црно-жолтите (ЦДУ и ФДП). Ако не биде симната црно-жолтата покраинска влада под водство на миленикот на Меркел, Давид Мекалистер, за ривалот на канцеларката, Штајнбрик, работите не изгледаат добро. Сите, од медиумите до внатрепартиските критичари, за тој пораз ќе го обвинуваат Штајнбрик - поради неговата афера со огромни хонорари за држење говори што ги добивал од стопанството, поради несреќните изјави за премалата плата на канцеларот и евтините вина кои не се за пиење. Од СПД се вели дека кандидатот за канцелар нема да биде сменет, но од отчукувањето на вистината социјалдемократите се тресат. И не се тресат само тие.
Партијата на левицата, која на последните покраински избори во Долна Саксонија славеше поради своето ширење на запад по кое се чезнееше, според актуелните анкети нема да стигне до прагот од пет проценти освоени гласови кои се неопходни за влез во покраинскиот парламент, како што беше случајот и со изборите во Северна Рајна Вестфалија и Шлезвиг Холштајн.
Овој ден се чини е судбински и за лидерот на либералите Филип Реслер. Во неговата партија веќе „се острат ножевите“ за да се симне бледата и раководно слаба „млада ѕвезда“, за каков што некогаш важеше Реслер.
Според некои предвидувања, неуспех на либералите на покраинските избори во Долна Саксонбија може да значи и неуспех на претстојните парламентарни избори за Бундестагот, наесен, што би било првпат во историјата на Германија еден сојузен парламент во своите редови да нема либерали.
Расположената канцеларка
Премиерот во Долна Саксонија Давид Мекалистер веројатно ќе продолжи да владее. Тој, според анкетите, би освоил околу 40 проценти од гласовите. Резултат, кој можеби широко ќе му ги отвори вратите за функција во Берлин. Се споменува функцијата на министер за образование, доколку актуелната министерка Анете Шаван се сопне на обвинувањата за плагијат за нејзината докторска работа. Во екот на изборната борба пред изборите во Долна Саксонија, канцеларката Меркел во последните две недели имаше дури седум јавни настапи во долносаксоната провинција во добро расположение, на страната на Мекалистер. За нејзината опуштеност има причина - дури и црно-жолтите да не освојат мнозинство, тоа малку ќе и‘ наштети на популарноста на Меркел во земјата. Нејзиниот кандидат Мекалистер најверојатно ќе освои добар резултат, па вината за поразот на актуелната коалиција ќе може да се припише на слабите либерали. Тоа, пак, на лидерката на најсилната партија во Германија, ќе и‘ отвори уште повеќе опции за коалицирање по изборите наесен.