Седум легендарни светски богатства
Луѓето отсекогаш биле фасцинирани од легендарните изгубени богатства. Токму поради тоа тие често се инспирација за книги и филмови како „Островот со скриено богатство“ и „Индијана Џонс“.
Потонатиот град
Почнуваме со Атлантида - мистичниот град од антиката. Овој град пред 11.000 години потонал на морското дно, барем така се вели... Долги години, под брановите на морето, истражувачите и хоби нуркачите бараат доказ за постоењето на овој грандиозен град. Затоа што, сепак, тој не бил измислен од некој пијан морнар, туку за неговото постоење сведочел и самиот Платон.
Изгубена во војната
Следна станица е палатата на Катерина во близина на Санкт Петерсбург. Денес, тука може да се види репликата на Килибарната соба. Еден поглед кон неа и станува јасно зошто некои ја сметаат за осмото светско чудо. За време на Втората светска војна, оригиналната соба била спакувана во 28 кутии од страна на германската војска и била испратена во замокот во Калининград - по што и се губи секаква трага.
Светото богатство
Богатството на Лима не носи во Јужна Америка. Тука, во 1820 година, за време на отпорот против шпанските колонизатори, гувернерот на Перу и Црквата ги сокриле своите скапоцености. Меѓу нив е и златна статуа на Девицата Марија, која била украсена со 1.700 скапоцени камења. Легендата вели дека е скриена некаде на островот Кокос.
Непроценливо богатство
Се вели дека самиот Бог ја дал наредбата да се изработи Заветниот ковчег пред речиси 3.000 години. Ковчегот бил користен за транспорт на камењата на кои се запишани десетте Божји заповеди. Експертите веруваат дека ковчегот исчезнал пред речиси 2.600 години и дека најверојатно се наоѓа под Ридот на храмовите во Ерусалим. Сепак, археолозите сеуште немаат доказ дека ковчегот навистина постоел.
Речни богатства
Се враќаме во Германија, каде на дното на реката Рајна, во близина на градот Вормс се наоѓа големо богатство. Барем така вели поемата од 13 век Нибелунгенлид. Според песната, Хаген фрлил 12 кочии полни со злато и скапоцени камења во реката. Низ историјата многу нуркачи се обидувале да го пронајдат богатството, но без успех.
Чудесно и мистeриозно
Светиот грал е пехарот од кој пиел Исус за време на Последната вечера. Многумина истражувачи и научници се обидуваат да го пронајдат уште од времето на кралот Артур од 12 век. Легендата вели дека, кога Исус бил распнат, еден од неговите ученици во пехарот успеал да собере неколку капки од неговата крв. По светиот пехар трагаа Харисон Форд и Шон Конери во филмот Индијана Џонс од 1989 година.
Среќа на крајот од виножитото
Последната легенда говори за човекот кој бил убеден дека на крајот на виножитото има богатство. Откако долго време трагал по него и не успеал да го најде, тој се истоштил и се откажал. Во тој момент, сфатил дека се наоѓа на крајот на виножитото и открил дека богатството кое го барал, всушност цело време било во него и дека тоа е среќата. Можеби токму ова е заедничкото за сите авантуристи?