Расмусен иден ген-сек на НАТО?
23 март 2009Педесет и шестгодишниот Расмусен е доволно искусен за да не наседне на бројните новинарски прашања околу неговата кандидатура за местото генерален секретар на НАТО. Но, последниве денови се згуснаа шпекулациите дека токму него го чека местото во Брисел. Ваквите информации добија посебно силен поттик откако и американските медиуми почнаа да јавуваат дека новата администрација во Вашингтон би била подготвена да го прифати актуелниот дански премиер на оваа одговорна функција.
Расмусен не зборува за местото генерален секретар, но затоа упадливо радо зборува за ангажманот на данските војници во мисијата на НАТО во Авганистан и со тоа се претставува како верен сојузник: „Данските трупи оперираат во покраината Хелманд. Тоа е многу опасно подрачје и веќе имаме не така мал број загинати војници поради тоа. Но, во Данска и понатаму превладува мислењето дека треба да се продолжи ангажманот во Авганистан“, вели премиерот Андерс Фог Размусен.
Има и поинакви мислења
Данска има околу седумстотини војници во мисијата на НАТО во Авганистан, од кои досега загинале повеќе од дваесетина. Споредено со бројот жители на Данска, тоа се најголеми загуби од сите земји вклучени во меѓународната мисија. Поради тоа, премиерот Расмусен пожнеа големи критики во сопствената земја, но ги издржа, а за генералите на НАТО тоа е уште еден аргумент повеќе во прилог на неговата кандидатура за иден генерален секретар. Местото ќе биде испразнето летоска, а се очекува името на идниот ген-сек да се објави на самитот на Алијансата за две недели. Фактот што Расмусен доаѓа од една од помалите европски земји само му оди во прилог, бидејќи тие полесно ја добиваат поддршката од останатите членки. Сепак, мора да се спомне дека членките на НАТО од Средна и Источна Европа овојпат за залагаат на оваа функција да дојде нивен претставник.
Данските медиуми шпекулираат дека е можно да дојде вето од Турција. Расмусен како премиер од редовите на конзервативна партија, имено, не го бие добар глас во исламскиот свет по објавувањето на спорните карикатури за Пророкот Мухамед, што ги лансираа токму данските медиуми.