Прекин на огнот во Источна Гута
27 февруари 2018
Населението во Источна Гута е во исклучително тешка состојба. Овој бунтовнички регион во Сирија е под опсада на владините сили од 2013 година. Минатата недела се водеа особено тешки борби. Сега, барем по неколку часа во денот, оружјето би требало да молчи. Така гласи наредбата на рускиот претседател Владимир Путин. Тој е еден од најважните сојузници на сирискиот властодржец Башар ал-Асад.
Според наводи на новинар на агенцијата Франс прес во Дума, најголемиот град во Источна Гута, релативно мирно било уште во текот на изминатата ноќ. Но, непосредно пред да стапи во сила прекинот на огнот, во осум часот изутринава по средноевропско време, повторно се слушал спорадичен артилериски оган.
Според рускиот министер за одбрана Сергеј Шојгу, т. н.„хуманитарни паузи“ би требало да траат од 9 до 14 часот по локално време, со цел да „се избегнат цивилни жртви во Источна Гута“. Освен тоа, ќе бидат создадени и „хуманитарни коридори“ за на цивилите да им се воозможи бегство од регионот кој е под опсада. Болните и повредените би требало да бидат изнесени од регионот со автобуси и возила за прва помош. Населението ќе биде информирано за ваквите мерки преку летоци и СМС-пораки.
Прекинот на огнот е можност за жителите на Источна Гута да излезат од подрумите, каде се со денови. Во регионот се опколени околу 400.000 луѓе. Сириската опсерваторија за човекови права соопшти дека само минатата недела во воздушните напади врз Источна Гута се убиени најмалку 550 цивили, од кои една четвртина - деца.
Според информацијата на агенцијата Франс прес, која се повикува на соопштение на руското Министерство за одбрана, сличен прекин на огнот би требало да има и во јужниот пограничен регион Ал Танф и Рукбан, во близина на границата со Јордан.
Повеќе:
- Меркел бара крај на масакрот во Сирија
Обединетите Нации ги поздравија најавите на Русија, но опоменаа дека треба целосно да се спроведе резолуцијата од викендот, која предвидува 30-дневен прекин на огнот ширум земјата. Русија, од своја страна, предупреди од опасноста од натамошно влошување на состојбата во сириската бунтовничка енклава. Министерството за надворешни работи во Москва соопшти дека три исламистички бунтовнички групи во регионот на маргините на Дамаск дејствуваат „под една заедничка команда“. Според официјална Москва, групите Џаиш-ал-Ислам, Ахрар ал-Шам и Ал-Нусра-фронтот во Источна Гута држат „стотици заложници, меѓу нив и жени и деца“.