Потресни фотографии од земјотресот во Италија

Еден човек утрово беше извлечен жив од под урнатините на една зграда во местото Аматриче.

Од земјотресот со јачина од 6,2 степени погоден е регионот на централна Италија. Силината на земјотресот ги разбудила и жителите на Рим, кој е оддалечен повеќе од 150 километри од епицентарот.

Последиците од природната катастрофа се видливи насекаде. Многу жители ноќта и денот го минуваат на отворено.

„Состојбата е драматична, има многу мртви“, изјави градоначалникот на Аматриче, Серџо Пироци. „Половина место е исчезнато“.

Ова е најсилниот земјотрес во Италија од 2009 година, кога 300 луѓе загинаа во земјотресот кој го погоди градчето Аквила.

Според првичните проценки, илјадници луѓе останаа без своите домови. Проценките на економските штети допрва ќе се прават.

Локалните власти се жалат дека помошта тешко пристигнува во погодените области поради големото разорување од земјотресот и непристапните предели. Се апелира за тешка машинерија и опрема за спасување.

Живописното планинско место Аматриче е познато туристичко место и е мека за жителите на Рим кои сакаат да избегаат подалеку од летните жештини во метрополата. Засега нема информации за жртви меѓу туристите.