Папата ги поддржа младите во барањата за промени

Папата Франциско ја следеше вчерашната процесија на Тажниот пат, во спомен на Исусовите маки од моментот кога е осуден на смрт до положувањето на неговото тело во гроб, која беше одржана на плажата Копакабана во Рио де Женеиро.

Процесијата беше едно од главните случувања на Светскиот ден на младите, кое требаше да ги потсети младите католици на корените на нивната вера оти Исус умрел за да ги искупи нивните гревови.

Тоа е пораката на која Франциско настојуваше да укаже во обраќањето на собраните верници, на кои им кажа дека Исус ги носи сите страдања во светот: семејствата чии деца паѓаат како жртви на „лажниот рај“ - дрогата, гладните „во свет во кој секојдневно се фрлаат тони храна“, на оние кои се прогонувани поради верата, убедувањата „или едноставно поради бојата на кожата“.

„Исус е здружен со толку голем број млади кои изгубиле вера во политичките институции, бидејќи во нив гледаат само себичност и корупција“, рече Франциско како уште една алузија за насилните демонстрации кои минатиот месец избија во Бразил против корупцијата и неефикасноста на државните институции.

Папата на собраните 2 милиони верници, меѓу нив најголем број млади, уште им порача:

„ Младите луѓе на улица се оние кои сакаат да бидат актери на промените. Немојте да дозволите други да бидат актери на промените“.

Франциско вчера го започна денот со слушање на исповедите на петмина млади аџии во паркот во Рио. Градоначалникот на бразилската метропола во меѓувреме најави дека очекува најмалку три милиони верници да учествуваат на денешната миса со која ќе биде завршена повеќедневната посета на папата на Бразил.

Посетата на земјата со најбројно католичко население во светот беше прво патување во странство на ппата Франциско во неговиот понтификат.