На барикадите: Икони на отпорот
Фотографијата на млада жена која мирно се соочува со специјалната полиција во Батон Руж стана хит на социјалните мрежи. Еве мал преглед на фотографии од протести ширум светот кои станаа легендарни.
Стоејќи гордо
Оваа фотографија стана препознатлив симбол на мирните протести кои се одвиваа во Батон Руж, во американската сојузна држава Луизијана под слоганот „Црните животи се важни“. Дваесет и осум годишната Иша Еванс од Њу Јорк, во долг фустан бестрашно стои среде улицата преполна со тешко вооружени полициски службеници.
Човек против тенк
Во јуни 1989 година непознат маж со торба за пазарење во рацете застана пред тенковите на Тианмен плоштадот во Пекинг и им го попречи патот. Ова се случи само еден ден откога кинеската војска употреби сила да ги задуши протестите. Осамениот демонстрант подоцна стана познат како Човекот-тенк, Незнајниот демонстрант и Незнајниот бунтовник.
Дете на цвеќето
Седумнаесет годишната Јан Роза Касмир во октомври 1967 година на вооружените војници, кои го обезбедуваа протестот против војната во Виетнам во Вашингтон, им се спротистави подавајќи им цвет од хризантема. „Тие беа само млади момчиња“, изјави Касмир неколку години подоцна во интервју и додаде „Тие би можеле да бидат мои партнери, би можеле да бидат мои браќа. И тие беа жртви во целата ситуација.“
Граѓанска непослушност
Во центарот на Монтгомери во декември 1955 година, од Роза Паркс беше побарано да го отстапи своето место во автобусот кој брзо се полнеше со патници. Таа одби, а потоа беше уапсена. Следуваше бојкот на јавниот транспорт во целиот град кој траеше цела година сè додека Врховниот суд не ја прогласи сегрегацијата како нелегална.
Промоција на мирот
Џон Ленон и Јоко Оно одржаа два ненасилни протестни преформанси кои траеа по една недела, познати под името „бед-ин.“ За време на нивното одржување во Амстердам и Монтреал, Квебек, беа поканети многу медиуми, а Џон и Јоко даваа интервју за нивните протести против војната во Виетнам.
Заробен во средина
На 25 јануари 2014 во Киев, помеѓу борбените редови на полицијата и демонстрантите се најде православен свештеник кој се молеше. Подоцна, украинските анти-владини протести се раширија и надвор од главниот град и сè повеќе луѓе бараа од Владата да одржува подобри односи со ЕУ
Вирално видео
Во 2011 година полициски службеник употреби спреј со солзавец врз група студенти додека лежеа на земјата за време на демонстрациите на Универзитет во Калифорнија, Дејвис, познати под името „Окупај“. Студентите мирно протестираа против покачувањето на трошоците за студирање. Подоцна, полицаецот Џон Пајк ја изгуби работата, а демонстрантите добија надоместок.
Жената во црвено
Фотографијата на Сејда Сунгур, жената во црвен фустан, набрзо стана симбол на антивладините протести кои се одвиваа во паркот Гези во Истанбул. За време на протестите во мај 2013 година полициски службеник ја нападна со солзавец младата девојка, а сликата од овој настан беше безброј пати споделувана на социјалните мрежи.
Македонската икона на отпорот
„Таа демонстрираше против македонската влада и притоа бакна штит на еден полицаец. Една фотографија ја направи Јасмина Голубовска, икона на отпорот“. Вака весникот „Зиддојче цајтунг“ информираше за протестите во Македонија во мај минатата година.