Најубавите фонтани во Европа
Водата има волшебна привлечна моќ, особено кога се презентира на посебен начин. Таков е случајот со овие фонтани во Европа.
Фонтаната на Трафалгар Сквер во Лондон
Фонтаните создаваат атмосфера и честопати се средишна точка на среќавање на туристите и мештаните. Така е и со фонтаната на Трафалгар Сквер, изградена во 1939 година во знак на сеќавање на двајца адмирали на кралската морнарица. За многу жители на Лондон, плоштадот е центар на градот. Кога ќе се седне на крајот на фонтаната, може да се набљудува пулсирањето на метрополата.
Фонтаната Треви во Рим
Оној кој ќе фрли паричка во водата, ќе се врати повторно во Рим, вели една легенда на која ѝ веруваат многу туристи. Зашто, секоја година на дното се собираат монети во вредност од околу еден милион евра. Фонтаната Треви е омилена кулиса и за филмаџиите. Особено е позната сцената од филмот „La Dolce Vita“, кога актерката Анита Екберг се капе во фонтаната.
Варшавската фонтана во Париз
Со своето корито, каскадите и фигурите Варшавската фонтана во Париз е огромно уметничко дело. Особено впечатливи се дваесетте „топовски цевки“ од кои на редовни временски отстојанија во насока на Ајфеловата кула бликаат млазеви вода во должина од околу 50 метри. Перфектно за разладување!
Петерхоф-фонтаните во Санкт Петербург
Во близина на Санкт Петербург на почетокот на 18 век царот Петар дал налог за изградба на негова верзија на францускиот дворец Версај - Петерхоф. Била изградена раскошна летна резиденција со систем на прекрасни фонтани кој секојдневно се активира во 11 часот. Тогаш од околу 150-те фонтани во Петерхоф во една секунда излегуваат по околу 30.000 литри вода.
Фонтаната Же-До во Женева
Млазот од фонтаната Же-До е висок околу 140 метри. На почетокот симболот на Женева воопшто не бил планиран како атракција, туку бил нужно зло. Служел како безбедносен вентил за водната пумпа со која биле покренувани машини од индустријата и фирмите. Кога забележале како спектакл претставува фонтаната, градските власти ја преместиле во езерото и го зголемиле притисокот.
Игрите на водата во Горскиот парк Вилхелмсхее во Касел
Горскиот парк Вилхелмсхее се наоѓа високо над Касел, а поради својот барокен дизајн во 2013 година беше прогласен за Светско културно наследство. Централен елемент се водопадите: од мај до октомври секојдневно по еден час низ каскадите на ридот се пушта вода, а круна на сѐ е 50 метри високиот гејзир кој со помош на притисок ја исфрла водата кон небото.
Џинот во Ватенс
Џинот во Ватенс, кај Инсбрук, испушта вода, а истовремено е и музеј за кристали. Неговиот „татко“, мултимедијалниот уметник Андре Хелер, на тој начин сака да ја раскаже приказната за џинот кој заминал во светот со цел да го доживее со сите негови богатства. Во Ватенс запрел и оттогаш бдее над своите чудесни реткости.
Фонтаната славина во Менорка
Како е ова можно? Славината лебди во воздух? Оваа фонтана во Менорка фасцинира и вчудовидува зашто се чини како водата да извира од нигде-никаде. Тоа не е чудо, туку илузија: носачите на фонтаната се сокриени во водата. Вакви лебдечки славини има на повеќе места, како во белгиски Иперн или во шпанскиот град Кадиз.
Фонтаната Манекен Пис во Брисел
Толку мал, а толку славен! И, згора на тоа уште и променлив. Манекен Пис има само 61 сантиметар, а сепак е симбол на Брисел. Бронзеното момченце кое уринира е голо, но редовно се облекува. На фотографијата е облечено во носија на рицарскиот орден Свети Михаил. Манекен Пис има 1000 различни облеки, сите со отворен шлиц.
Магичната фонтана Монтжуик во Барселона
Магичната фонтана е изградена во подножјето на Монтжуик во 1929 година по повод Светската изложба во Барселона. Сиот раскош на фонтаната е видлив најмногу ноќе, кога се истакнува посебно со музика и светлосни ефекти. Од фонтаната во една секунда излегуваат по околу 2000 литри вода. Доживувањето, како што вели и името, е магично!