Најубавите германски замоци
Во Средниот век на просторот на германското говорно подрачје биле изградени околу 20 илјади тврдини. Повеќето низ годините биле уништени или пропаднале, оние кои останале се реновирани и денес се омилени места за излет.
Тврдината Елц
Таа ја красеше банкнотата од 500 германски марки и на тој начин стана една од најпознатите тврдини во Германија. Изградена е на почетокот на 12. век на извонредна позиција, на карпа висока 70 метри. Тврдината е реновирана и уредена, па денес е цел на бројни домашни и странски туристи.
Замокот Хоенцолерн
За оваа фотографија од бајките во морето облаци, замокот Хоенцолерн може да и‘ заблагодари на својата позиција. Се наоѓа на надморска височина од 855 метри, во сојузната покраина Баден Виртемберг. Пруските владетели го обновиле ова древно седиште на нивните предци во 1850 година. Од династијата Хоенцолерн потекнуваат германските кралеви од периодот од 1871. до 1918. година.
Твдината Бургхаузен
Тоа, според Гинисовата книга на рекорди, е најдолгата тврдина во светот. Нејзините бедеми се долги 1051 метар. Се наоѓа над истоимениот град Бургхаузен во Баварија. Изградена е во 11. век, а првобитно била намената како резиденција за семејството Вителсбах.
Вартбург
Тоа е најважната германска тврдина. Изградена е во 1067. година над градот Ајзенах. Од 1521 до 1522 година во неа прибежиште нашол христијанскиот реформатор Мартин Лутер. Тука на германски го превел Новиот завет. Од 1999. година Вартбург е дел од листата на Светското културно наследство на УНЕСКО.
Нирнбершкиот дворец
Нирнбершкиот дворец во Средниот век бил еден од седиштата на царевите на Светото Римско Царство. Тие со векови, повремено, престојувале во тврдината. Во Втората светска војна замокот претрпел големи штети, но подоцна е реновиран во својот историски облик. Денес е најголема туристичка знаменитост на градот Нирнберг.
Марксбург
Марксбург е изграден во раниот 12. век. Се наоѓа над градот Браубах. Оваа тврдина во најголемиот дел е сочувана во својот изворен облик и по тоа е единствена во тој дел од Рајнската област. Од 2002. е сместена на листата на УНЕСКО на Светското културно наследство.
Тврдината Рајнштајн
И тврдината Рајнштајн е сместена на карпи над Рајна. За првпат се споменува во 1323 година. Низ вековите речиси целосно пропаднала. Во 1823. година ја купил принцот Фридрих фон Пројсен, а ја реновирал познатиот германски архитект Карл Фридрих Шинкел.
Тврдината Алтена
Во оваа тврдина во сојузната покраина Северна Рајна Вестфалија, учителот Ричард Ширман во 1914 година го отворил првиот хостел во светот. Градбата е стара повеќе од 800 години. Со векови пропаѓала, а целосно е обновена во 1918 година.
Тврдината Зацвеј
Тоа е една од најдобро сочуваните германски тврдини, опкружена со вода. Зацвеј се споменува уште во 12. век. Бидејќи се наоѓа во рамнина, а не на карпа, била заштитена со водени површини. Тврдината денес е населена, а во еден дел е сместен и историски музеј. Тука се одржуваат и витешки игри.
Замокот Мерсбург
Ова е најстариот замок во Германија кој е се‘ уште населен. Мерсбург е сместен на Боденското езеро, а изграден е уште во 7. век. Со векови бил седиште на тамошните бискупи. Денес оваа тврдина и нејзината питорескна околина се цел на бројни домашни и странски туристи.