Најлуди рекорди - по 60. пат
Луди спортски рекорди или животите на ѕвездите: Сето тоа може да се најде само во Гинисовата книга на рекорди, која 2015 година ќе биде издадена по 60. пат. Ние ви претставуваме некои од лудите рекорди од новото издание.
Најбрзото четвороножно животно на две нозе
Пет метри за 7,76 секунди - светски рекорд, и тоа за одење на две нозе. Тоа е добар резултат ако се земе в предвид дека се работи за четвороножно животно. Шпицот Џиф од Лос Анџелес е горд на тоа, но уште погорди се неговите сопственици кои со својот љубимец тренираат секојдневно.
Палка за голф за оние со добар вид
4,39 метри - толку е долга најдолгата палка за голф во светот. Таа е „изум“ на германскиот професионален играч на голф Карстен Мас. Но, она што е пофасцинирачко од неговата должина е фактот дека со таа палка навистина може да се игра голф. Сепак со оглед на одалеченоста на топчето им се препорачува само на оние со добар вид.
Глобални металци
Познати се по нивната жестока музика, но сега бендот „Металика“ влезе во Гинисовата книга на рекорди како група која во една година свирела на сите седум континенти, вклучувајќи го и Антарктикот. Коментар на бендот: „Ние не знаевме дека го поставивме тој рекорд“.
Традиционално јадење на шпански начин
Повеќе од пет метри во пречник, седум сантиметри дебела и тешка 1,5 тони - тоа се димензиите на најголемата досега направена тортиља. Шпанското национално јадење е всушност еден вид омлет. Јадењето го подготвуваа дванаесет кувари во баскискиот град Виторија. За јадењето беа потребни 15.000 jajцa, 30 главици лук, 10 килограми сол и 150 литри маслиново масло.
Најбрзо продавани албуми
Американската пејачка Бијонсе со својот албум „Beyonce“ постави рекорд во продажба на албуми преку платформата iTunes. За само три дена албумот беше „симнат“ 830.000 пати.
Колекција на полициски капи
Сѐ почна со капата на дедото. Дедото бил полицаец и така во последните 35 години на полиците на Андреас Скал (исто така полицаец) се собрале 2.293 полициски капи од 231 земји. „Најтешко беше да се дојде до полициска капа од Ватикан“, коментира необичниот колекционер.
Најбрзата тенисерка
Србите ги имаат Ана Ивановиќ и Јелена Јанковиќ, а Германците ја имаат Сабине Лизики. Таа неодамна во Њујорк доби официјална потврда за „најбрз сервис во женскиот тенис“.
Со риба и поезија до длабока старост
Најстариот маж на светот официјално е Јапонецот Сакари Момои. Тој има 111 години, малку послабо слуша, но здравствено инаку е во ред. Радо јаде риба и чита кинеска поезија и затоа, вели, е долговечен.
Книгата - рекор
И Гинисовата книга на рекорди сама по себе е рекордна. Она што почна како нешто што треба да ги разбие грижите на муштериите во ирската пиварница Гинис, се претвори во глобален бизнис. Во печатеното издание на книгата има место само за околку десет проценти од пријавените и признати рекорди.