1. Прескокни до содржината
  2. Прескокни до главната навигација
  3. Кон други страници на DW

Мир во куќа? ЦДУ, ЦСУ и СПД со договор за бегалците и азилот

Марина Штраус
6 јули 2018

Владејачките партии во Германија со недели спореа околу бегалската политика и азилот. Сега судирот е решен, но спроведувањето на договореното може да биде тешко.

https://p.dw.com/p/30v9N
Deutschland Asylstreit Koalitionsausschuss Nahles und Scholz
Фотографија: picture-alliance/dpa/K. Nietfeld

Секој ја покажува својата радост за постигнатиот компромис на свој начин. Еден - Хорст Зехофер - се опишува како „многу задоволен министер за внатрешни работи“, друг - заменикот шеф на СПД, Олаф Шолц - го фали крајот на „летниот театар“.

По повеќенеделен судир, закани со повлекување и повлекувања од повлекувањето, трите партии во големата коалиција во Берлин постигнаа согласност за текст на две страни, кој носи наслов „Уредување и управување во миграциската политика“. Компромисот на ЦДУ на Меркел, на нејзината сестринска партија ЦСУ и на СПД, се состои пред сѐ во тоа мигрантите на границата меѓу Германија и Австрија да се пресретнат и доколку веќе поднесле барање за азил во друга земја на ЕУ - повторно да се вратат таму.

Deutschland Asylstreit Koalitionsausschuss Seehofer
Хорст Зехофер е задоволен од договоренотоФотографија: picture-alliance/dpa/K. Nietfeld

Крај на владината криза

Досега не беше јасно дали социјалдемократите ќе се согласат со „дилот“ на двете конзервативни сестрински партии постигнат на почетокот на неделава. Најмногу се спореше околу „новиот граничен режим“ со „транзитни центри“, кој го предложи министерот за вантрешни работи Зехофер. Поимот „транзитни центри“ е „проблематичен за нашиот коалиционен партнер“, рече тој вчеравечер пред новинарите, по состанокот на Коалициската комисија. За љубов на СПД сега сите зборуваат за „транзитна постапка“, процес низ кој, според Зехофер, ќе минуваат само бегалците кои веќе поднесле барање за азил во друга земја.

Повеќе: Меркел се спаси со бегство во тврдината Европа

Deutschland Asylstreit Koalitionsausschuss Nahles
Андреа Налес: Нема да има никакви камповиФотографија: picture-alliance/dpa/K. Nietfeld

Целата „транзитна постапка“ би требало да трае 48 часа и да се одвива во објекти на сојузната полиција во близина на границата. Бројот на оние кои ќе минуваат низ ваква постапка веројатно нема да биде голем. „Сметаме дека нема да бидат повеќе од десет (дневно, н.з.), веројатно ќе бидат помалку“, изјави Шолц. Актуелните бројки покажуваат дека во првите три месеци од годината на германско-австриската граница барања за азил поднесле 248 лица.

Зехофер: „Не се во затвор“

Шефицата на СПД, Андреа Налес, нагласи дека нема да има „никакви кампови“. Со тоа одговара на обвинувањата кои во последните денови доаѓаа од членови на нејзината партија и делови од опозицијата дека се сака создавање на затворски кампови за бегалци на германско-австриската граница. На ваквите обвинувања остро се спротивстави и Зехофер: „Тие не се во затвор“, изјави тој. „Има причина зошто не можат да влезат во СР Германија, но лицето може да замине на кое било друго место во светот.“

Според Зехофер, „ова друго место во светот“ би било најдобро да е ЕУ-државата каде бегалецот поднесол барање за азил. Но, тоа, со оглед на актуелната состојба, нема да биде толку едноставно. Австрија досега одбива да ги прими назад барателите на азил кои нема да добијат дозвола за влез во Германија и за кои ЕУ-државата каде поднесле барање за азил одбива прием. Со тоа не се согласува ниту унгарскиот премиер Орбан. А, постигнување договор со Италија е речиси исклучен.

Deutschland Asylstreit Koalitionsausschuss Merkel
Ангела Меркел не даде изјава по средбата на Коалициската комисијаФотографија: picture-alliance/dpa/K. Nietfeld

Надеж за билатерални договори

На прашањето - што доколку договор со Италија не се постигне, Зехофер во Берлин одговори: „Не се занимавам со сценарија кои воопшто не настапиле и можеби воопшто нема да настапат.“ Министерот за внатрешни работи се надева дека трилатералниот разговор со Италија и Австрија наредната среда ќе донесе излез од дилемите.

Налес потенцираше дека вчера постигнатите заклучоци можат да стапат во сила кога навистина ќе има „билатерални договори“ со други земји. Иако тоа се чини далеку, Налес оцени дека компромисот на нејзината СПД со ЦДУ и ЦСУ е „добро решение“. Како успех СПД го презентира и фактот дека уште годинава треба да се отвори патот за нов закон за доселување во Германија, со кој земјата треба да го регулира доселувањето на странски стручњаци.

Повеќе: Најголемите владини кризи во Германија

Ако пред неколку дена се зборуваше за владина криза, оставка на министерот за внатрешни работи и распад на коалицијата, сега се чини како сѐ да е хармонично. За компромисот не се изјасни само канцеларката Меркел. А, веројатно на крајот на краиштата од нејзе ќе зависи дали ќе се постигнат билатерални договори за враќање на бегалците. Како што подвлече и Хорст Зехофер: на крајот одговорноста за договорите со други земји лежи кај канцеларката.