Директен контакт со ајатолахот Хамнеи?

Видео-пораката на американскиот претседател Барак Обама по повод иранската Нова година од петокот во која тој му понуди дијалог на Иран е дел од новата сеопфатна стратегија на САД кон Иран, пишува весникот „ Њујорк тајмс“. Притоа се размислува и за можна директна комуникација со верскиот лидер на исламската република, ајатолахот Хамнеи.

Ајатолахот Хамнеи воздржано реагираше на понудата на Обама, истакнувајќи дека најнапред е неопходна вистинска промена во американската политика.

Хамнеи: „Што е всушност сменето?“

Во традиционалниот говор по повод иранската нова година, Хамнеи ја означи понудата на американскиот претседател како двосмислена. „ Вие им посакувате се’ најдобро на Иранците за нивната Нова година, но истовремено Вие го обвинувате големиот ирански народ дека го поддржува тероризмот и дека се стреми кон нуклеарно вооружување. Велите: Ајде да преговараме и да започнеме нови односи. Говорите за промена во политиката. Но каде е тогаш оваа промена? Што е во суштина сменето?“, истакна Хамнеи. Тој уште порача дека исламската република нема да дозволи да биде вршен притисок врз неа и од САД побара убавите пораки да ги преточат во конкретни дела. „ Дали се промени вашето непројателство кон иранскиот народ? Во што може да се види тоа? Дали ги укинавте неправедните санкции кон Иран? Дали престанавте да го обвинувата иранскиот народ и неговото политичко раководство. Дали ја прекинавте безусловната поддршка за ционистичкиот режим? Што тогаш се промени?“, истакна Хамнеи.