Двојно убиство во Хале, пукотници во Ландсберг

Двојното убиство во Хале се случи околу пладне. Двете лица се убиени на улица, во кварт кој се наоѓа северно од центарот на градот. Квартот и главната железничка станица во Хале се блокирани. Градоначалникот на Хале, Бернд Виганд, го свика Штабот за вонредни ситуации. Во состојба на аларм се и сите спасувачи од противпожарната служба. За граѓаните е отворена посебна телефонска линија.

Намера да се влезе во синагогата?

Околу мотивите за убиството властите сѐ уште не даваат информации. Во квартот каде што се случи двојното убиство има и една синагога и еврејски гробишта. „Шпигел“ го цитира првиот човек на еврејската заедница, Макс Привороцки, кој вели дека осомничените сакале да влезат во синагогата, каде имало околу 80 луѓе. Преземените безбедносни мерки на влезот „го издржаа нападот“, нагласува Привороцки. Денеска е Јом Кипур, најважниот еврејски празник.

Телевизијата МДР, пак, пренесе изјава на очевидец кој тврди дека напаѓач со оружје се обидел да влезе на еврејските гробишта и притоа застрелал девојче.

Уапсено едно лице

Осомничените напаѓачи избегале со автомобил и по нив се трага. Во меѓувреме, полицијата јави за едно уапсено лице. Полицијата ги повика луѓето да останат во своите станови и да побараат сигурно засолниште.

Пукотници и во Ландсберг

Во меѓувреме за пукотници се јавува и од Ландсберг, на 15 километри источно од Хале. Полицијата потврди дека се пукало, но нема други подетални информации. И од тамошните жители се бара да не ги напуштаат домовите.

Портпаролот на германската влада Штефен Зајберт изјави дека се работи за „ужасни вести“ и изрази надеж дека „полицијата ќе го фати извршителот или извршителите најбрзо што е можно и дека ниту еден друг човек нема да се најде во опасност“. Според Зајберт, сега е многу важно населението да ги следи упатствата од полицијата. Портпаролот на владата сѐ уште нема информации за мотивите за нападот.