Г20: Заложба за фер распределба на ковид-вакцините

Министрите за трговија од земјите на Г20 се обврзаа дека ќе промовират „праведна распределба“ на вакцините против Ковид-19, особено преку укинување на „ограничувањата на извозот“, како и дека ќе работат на „мултилатерален и транспарентен трговски систем“.

Нивната заклучна декларација, усвоена по состанокот во Соренто на југот на Италија, е знак за „започнување на мултилатерализам“, порача министерот за надворешни работи на Италија, Луиџи Ди Мајо, чија земја претседава со Г20.

„Мораме да обезбедиме поголема циркулација на вакцините и на фабриките за нивно производство во земјите во развој“, изјави за време на состанокот францускиот министер за надворешни работи Франк Ристер.

Во сиромашните земји се вакцинирани само 1,4 отсто од населението

Во светот се произведени и применети над 6 милијарди дози вакцини против Ковид-19, но само 1,4 насто жители од земјите со ниски приходи се вакцинирани, наспроти 58 отсто жители од богатите земји, нагласи на почетокот на октомври генералната директорка на Светската трговска огранизација (СТО), Нгози Окоњо-Ивеала.

Со приближување на дванаесетата министерска конференција на СТО, предвидена од 30 ноември до 3 декември во Женева, таа ги повика членовите на организацијата да договорат „силен одговор на пандемијата“ и да постават темели за „поправедна распределба“ на вакцините.

Друг предизвик на преговорите е „олеснување на користењето на исклучоците од правата на интелектуална сопственост за да се овозможи производство секаде во светот“, објасни францускиот министер Ристер.