Воениот совет го скрати изборниот процес во Египет

Владејачкиот Воен совет во Египет издаде декрет со кој треба да се забрза изборниот процес во земјата. Според декретот, изборите за горниот дом на парламентот - Шура, ќе се одржат во две наместо во три фази и ќе завршат на 22 февруари наместо на 12 март. Покрај тоа, Шурата ќе може да ја одржи конститутивната седница речиси еден месец порано, односно на 28 февруари. Двата дома на парламентот би можеле со тоа значително порано од планираното да започнат со работата на составување на новиот устав. Колкаво ќе биде вистинското влијание на пратениците во тој процес засега е нејасно. Наредната недела пак, ќе започне третата завршна рунда од гласањето на изборите за долниот дом на парламентот. Резултатите од досегашното гласање укажуваат на убедлива победа на исламистичката партија - Муслиманско братство.

Инаку, се очекува дека побрзото завршување на повеќестепениот изборен процес во Египет би можел да влијае смирувачки врз протестите во земјата против Воениот совет. 59 лица досега загинаа во судирите на крајот на ноември и во декември меѓу безбедносните сили и демонстрантите кои бараат војската итно да ја предаде власта на цивилна влада.

Автор:СН/ЕМФ/афп/ртр

Редактор: Жана Ацеска