Алумни-порталот Германија стигна и во Македонија

Македонија од синоќа и официјално стана дел од глобалниот „Алумни-портал Германија“. Станува збор за интернет платформа преку која лицата кои студирале, работеле или се родени во Германија можат да одржуваат контакти, да бараат работа или да аплицираат и да добиваат податоци за студирање или дообразување.

Таканаречената „онлајн комуна“ функционира во 182 земји со над 65 илјади членови, а нуди и можност за лоцирање на висококвалификувани соработници со познавање на германскиот јазик и култура. Петра Седи од канцеларијата на ДААД, Германскиот центар за академска размена во Скопје, објаснува дека проектот треба да им овозможи на сите алумни, пријатели на Германија, да контактираат меѓу себе, да ги искористат своите искуства. Исто така и за германските фирми во Македонија да дојдат до контакт со луѓе кои го знаат германскиот јазик и култура и кои можат да работат кај нив.

Амбасадорката - прв член на порталот

Во Македонија според податоците има регистрирано 130 таканаречени алумни, луѓе кои студирале со германски стипендии, професори, научници, експерти. Сите тие сега се дел од интернет Алумни-порталот. Честа да биде првиот регистриран член од Македонија и’ припадна на македонската амбасадорка во Берлин, Корнелија Утевска-Глигоровска. Алумни-порталот според неа нуди одлична можност за корисниците:

„Мислам дека е одлична можност да се биде во тек со настаните во Германија и да се учествува на блогови и платформи за дискусија на разни актуелни теми и на отворен пазар да се одмерат силите со останатите кандидати, бидејќи мора да се каже дека Германија е во фаза на отворена дискусија околу недостигот на квалификувани кадри. Порталот отвора токму можност Германија да си обезбеди квалификувани кадри, а од друга страна на корисниците да им се овозможи да ги прошират своите хоризонти“, вели Утевска-Глигоровска.

Академска размена

Професорот Валентин Мирчевски е претседател на Хумболд и ДААД клубот во Македонија, асоцијација која ги обединува алумните. Клубот постои седум години и основна задача му е афирмација на двете фондации и регрутирање на млад кадар кој би ја афирмирал Македонија во академската размена со Германија. Идејата за порталот според него е извонредна:

„Интересно е што овој портал, виртуелен форум, не ги обединува само Хумболд и ДААД алумните туку има и многу поширок опсег. Во суштина и нашиот клуб не е ексклузивно организиран само за Хумболд и ДААД, туку е наменет практично за сите интелектуалци кои сакаат на некаков начин да дадат придонес во општата академска соработка со Германија“

Алумни-порталот Германија во светот функционира две години како заеднички проект на германски организации за политичко-развојна, економска, културна и научна соработка. Целосно е финансиран од Германското министерство за економска соработка и развој.

Автор: Костадин Делимитов

Редактор: Горан Чутаноски