Агунг заканувачки татни, евакуација на Бали
27 ноември 2017Националната индонезиска служба за менаџирање катастрофи на Фејсбук напиша дека исфрлањето пепел од планината Агунг до висина од 3400 метри повремено е проследено со експлозивни ерупции и слабо заканувачко татнење. Ноќе зачестено се гледаат огнени блесоци. „Тоа укажува на опасност од претстоечка посилна ерупција“, истакнуваат властите. Селата околу вулканот се покриени со пепел, зоната на опасност околу вулканот од седумипол е проширена на десет километри. Властите прогласија аларм од највисок степен. Оттаму веќе се заминати околу 40.000 луѓе, но треба да бидат евакуирани најмалку уште толку. Меѓународниот аеродром на островот Бали останува и натаму привремено затворен, што погоди преку 400 летови, од кои речиси 200 се меѓународни.
Вулканот последен пат беше активен во 1963. година, кога загинаа преку 1.000 луѓе, а бројни села беа уништени. Бали е познат туристички центар, со своите плажи и храмови привлекува милиони туристи од цел свет.