Najeriya: Fargabar barkewar rikici

Zanga-zangar dai ta faro ne makonni biyun da suka gabata, a matsayin ta lumana da nufin kawo karshen rundunar 'yan sandan musamman masu yaki da fashi da makami wato SARS. Sai dai ko bayan rushe rundunar ta SARS da maye gurbinta da rundunar SWAT sakamakon matsin lambar matasan masu zanga-zanga, ba ta sauya zani ba domin kuwa sun ci gaba da yin kira da a gudanar da sauye-sauye a rundunar 'yan sandan da ma bangaren tsaro baki daya.

Zanga-zangar ta fantsama a sauran sassan kasar, inda a arewacin kasar suke yin kira da a kawo karshen rashin tsaro. Sannu a hankali kuma, zanga-zangar ta rikide zuwa tashin hankali a wasu sassan kasar, ciki kuwa har da jihohin Lagos da Kano da kuma Plateau.