Tsohon shugaban Pakistan Pervez Musharraf ya rasu

Marigayi Musharraf mai shekaru 79 a duniya ya shafe shekaru fiye da 10 yana mulkin Pakistan, bayan kwace mulki daga gwamnatin farar hula a shekarar 1999. Rundunar sojan Pakistan ce ta sanar da mutuwar tsohon shugaban a cikin wata sanarwar da ke cewa. "Allah jikan mamaci, ya kuma ba wa iyalansa jimirin rashi."

Rawar da Pervez Musharraf  ya taka a aikin soja 

An haifi Pervez Musharraf a shekara 1943 a birnin New Delhi na India, yana da shekaru hudu mahaifansa suka kaura zuwa cin rani da Musulmai ke yi a sabuwar kasar Pakistan.

Pervez Musharraf ya shiga aikin soja tun yana dan shekaru 18, ya jagoranci bataliyar sojan kundun balan kasar. A shekarar 1999 ya karbi mulki da tsinin bindiga daga gwamnatin Nawaz Sharif, bisa rikicn yankin Cachemire da ya barke a tsakanin Pakistan da Indiya.

Ya kasance babban abokin dasawar Amirka bayan harin 11 ga watan Satumba na 2001, wanda hakan ya ba wa gwamnatinsa kima da samun karbuwa a wajen kasar, duk da yake ta mulkin soja ce, ya kuma shiga yakin ta'addancin Amirka gadan-gadan.

Gwamnatinsa ta yi tagomashi ga masu zuba hannun jari na ketare, ya samu damar aiwatar da sauye-sauye, sai dai daga karshe ya fuskanci matsin lamba a cikin gida.

Burin Musharraf ya kasa cika na zama dan majalisa
Jam'iyyar Pervez Musharraf ta sha kaye a babban zaben 2008 bayan ya shafe shekaru 11 yana mulkin Pakistan, ya yi barazanar rusa majalisar dokoki, matsin lamba ya tilasta masa yin murabus inda ya samu mafakar siyasa a Ingila.

Ya sake neman kujerar dan majalisar dokoki a Pakistan bayan komawarsa gida a shekarar 2013 ba tare da ya yi nasara ba. 

A shekarar 2016 an ba shi izinin fita zuwa Dubaï, shekaru uku wata kotu ta yanke masa hukuncin daurin rai-da-rai bisa tuhumarsa da cin amanar kasa, sai dai daga bisani wata kotu ta wanke shi daga aikata laifukan.