An kashe sojojin Jamhuriyar Nijar da dama a Inates

Lamarin ya faru ne a tsakiyar ranar jiya, inda wasu motocin biyu shake da bama-bamai su tarwatse a cikin barikin sojan, kafin daga bisani maharan da suka yi kawanya su bude wuta.

A wata sanarwar da ta fitar a yau din nan, ma'aikatar tsaron kasar ta Nijar ta ce duk da hasarar sojojinta 18, askarawan kasar tare da taimakon rundunar sojan sama na Amirka da Faransa, sun fatattaki 'yan ta'addan tare da hallaka wasu da dama.

Yankin dai na yammacin Nijar mai makwabtaka da Mali da Burkina Faso na fuskantar hare-haren 'yan ta'adda a kai-a kai tare da zama sanadiyar mutuwa ta sojojin kasar da dama.