Sojoji sun yi juyin mulki a Thailand

Hafsan soji a Thailand Janar Prayuth Chan-ocha ya sanar da cewar, rundunar kasar ta karbe madafan iko sakamakon gazawar yunkurinsa na sasanta 'yan siyasar da ke adawa da juna. Jagoran rundunar sojin wanda ya sanar da kifar da mulkin cikin jawabinsa ta gidan talabijin, ya ce matakin ya zamanto wajibi domin kauce wa karin asarar rayuka da rigingimu da kuma lalata gine ginen gwamnati, kamar yadda kasar ta tsinci kanta cikin watanni da suka gabata. Kifar da mulkin dai ya kawo karshen tattaunawar sulhu da ya shiga rana ta biyu a wannan Alhamis, da ke gudana a harabar club din rundunar ta soji a birnin na Bangkok, inda hafsan sojin tun a jiya ya fara tattaunawa da wakilan sassan da ke adawa da juna, domin samar da mafita a rikicin siyasar kasar ta Thailand daya jima cikin yamutsi.

Mawallafiya: Zainab Mohammed Abubakar
Edita : Usman Shehu Usman