Najeriya: Adashin gata don taimaka wa karamin karfi.

Wani sabon shirin adashin gata a banagren gwamnatin tarrayar Najeriya dai na fatan sauya makomar miliyoyin yan aikin dake kasar a nan gaba. Karkashin shirin da shugaban kasar ya kaddamar a Abuja dai kananan ‘yan aikin da kuma masu takama da sana’ar gado na iya ajiye kudade ko dai kullum ko a mako mako koma a wata sannan kuma su samu kaso 40 cikin dari na kudaden a lokacin da suke da bukata a fadar Muhammad Sani dake zaman sakatare na hukumar adashin gata ta kasar.

Akwai dai fatan rage talaucin tsofaffi da kusan kaso 85 cikin dari idan an yi nasarar rarrashin masu sana’o’in na bude asusun ajiyar da kamfanonin fansho daban daban dake kasar.

Ayuba  Waba dai na zaman shugaban kungiyar kodagon tarrayar Najeriyar ta NLC da ta kunshi kananan ma’aikatan dake aiki ga gwamnatin dama kamfanoni manya da kanana. Kuma a fadarsa sabon tsarin na shirin bude sabon babi a kokarin rage fatara da talauci tsakanin ma’aikata. Babbar matsalar ‘yan fansho cikin kasar a halin yanzu dai na zaman kasa biyan hakkoki da ma wakaci ka tashi da kudaden da ke zaman hakkin ‘yan fanshon,

Ko a farkon wannan mako dai sai da wata kotu a Abuja ta kai yanke hukuncin dauri kan wani jami’in kudaden fanshon bayan wasashe tsabar kudi kusan Naira Miliyan Dubu 22. Kuma a cewar shugaban kasar gwamnatin ba ta shirin yin kasa a gwiwa a kokarin tabbatar da komai dai dai a cikin tsarin fanshon.

Ko bayan dora kusan kowa bisa tsarin fanshon dai tarrayar Najeriya na fatan samar da kari na kudade domin aiyyukan raya kasa don cigaban al’umma.