Mutane 6 sun rasa rayukansu a Afghanistan.
June 7, 2006Talla
Tashin wasu bamabamai guda 3 a Afghanistan, ya janyo asarar rayukan mutane 6, a cikinsu har da sojojin Amirka guda biyu. Tuni dai ’yan ƙungiyar Taliban, sun yi ikirarin dasa bamabamai a gefen titi a gabashin ƙasar, waɗanda tashinsu ne ya janyo mutuwar sojoji biyun na Amirka, da jin raunin wasu dakaru biyu kuma na ƙasar. A Kudu maso gabashin ƙasar, wani ɗan harin ƙunan baƙin wake, ya ta da bamabamai cikin motarsa, yayin da ya kutsa da ita cikin ayarin motocin sojin Amirka, inda a nan ma sojoji uku suka ji rauni.
Kazalika kuma, mutane 3 ne rahotanni suka ce sun sheƙa lahira a dai wannan yankin na kudu maso gabashin Afghanistan din, bayan da wasu bamabamai da ake shirin ɗaurawa kan babur a wata makaranta, suka yi bindiga.