Mafarkin shiga Turai - 'Yan Afirka sun makale a hanya

A kudancin Italiya an kafa wuraren zama masu kazanta kamar wadannan. Daruruwan 'yan Afirka suna zuwa nan wurin musamman lokacin bazara, don nema wa kansu kudi da kuma iyalansu. Suna neman aiki a lambunan da sauran manyan gonakin manoman kasar Italiya - sau tari a banza, domin albashin na kara faduwa yayin da yawan bakin hauren ke karuwa.

Kimanin 'yan Afirka 1000 ke zaune a wannan unguwar talakawa dake yankin Apulien, sannan yawansu zai karu a lokacin zafi. A wannan lokaci ne yanayi a tekun Bahr Rum ke da kyau, saboda haka mutane na wannan tafiya mai hadari. Mazauna wannan unguwa da ta kunshi tsoffin gidajen gona da bukkokin da aka kafa ba da izini ba suna kiranta "Ghetto". Babu wutar lantarki da ruwan sha da kuma makewayi.

Duk me son ya rayu a "Ghetto" dole ya taimaki kansa da kansa. Ana amfani ga jenereto don samun lantarki. Wanda ke da hazaka ko aikin hannu na neman aikin gyare-gyare kamar a wannan shagon kekuna. Mutane da yawa a wannan unguwar sun dogara ne kan keke don samun abin hawa. Me son fita daga "Ghetto" zuwa wurin aiki a gonaki sai yayi hayar keke ko kuma ya taka sayyada.

A garin Foggia mai tazarar kilomita 15 daga "Ghetto" akwai manyan gonaki inda a wasu lokutan bakin daga Afirka ke samun aikin yi. Babu wani aiki dabam a Apulien, yankin dake da karancin masana'antu, an fi dogara da aikin gona. Fiye da kashi 15% na mutane a nan ba su da aikin yi, sakamakon rikicin tattalin arziki a Turai.

Su ma sun san neman kudi na da wuya. Ibra Mbacke Fall da Ngor Sarr daga Senegal. Ngor bai jima da samun izinin aiki na wucin gadi ba - ba safai ba. "Babu biya mai kyau a kwadagon jefi-jefi inji Ibra. Euro 3.50 cikin awa ake biyan masu girbar timatir. Daga ciki dan shekaru 32 na ba da wani kaso ga "Caporali": wata kungiyar Mafia ta 'Yan Afrika da Italiya.

Mazauna "Ghetto" ba su da kariya daga ta'asar "Caporali". Tana cin karenta ba babbaka a unguwar, tamkar wata kasa ce cikin wata kasa. Tana da dokokinta. Fitaucin miyagun kwayoyi da karuwanci sun zama ruwan dare. "Kasar na da wasu matsaloli daban", abin da ake ji ke nan daga hukumomin kudancin Italiya. Duk da haka likitoci kan kula da jama'a. An yi musu tanadin makewayi na tafi da gidanka.

Yawancin Italiyawa dake kusa sun san unguwar ne ta hotunan telebijin. Ba wanda ke shiga unguwar don radin kai, inji Archangelo Maira. Wannan dan Mishan na Katholika na gwagwarmayar ganin an inganta halin rayuwa a "Ghetto". Da shi da masu ba da taimako na shirya darussan koyon harsuna. "Akasarin mazauna unguwar ba su da takardun izinin zama. Rayuwa a nan ba ta dace da dan Adam ba", inji shi.

A "Art Village", mai nisan awa daya da mota daga "Ghetto", 'yan Afirka na koyan aikin ginin gida, inda nan gaba za su tare ciki. Hukumomin yankin na daga cikin masu tallafa wa aikin da kudi, sai dai bai taka kara ya karya ba. Masu koyon sana'ar guda 12 ne ke a wannan wuri, amma dubbai ne ke a unguwar marasa galihun.

"Na kasance haramtaccen bako a cikin kasar inda na yi ta sayar da kaya a kan titi. A nan 'Art Village' sun taimaka mini kuma yanzu na samu takardar izinin zama cikin kasa", inji Mbaye Ndiaye. Shi ne shugaban kungiyar 'yan gudun hijira ta "La Senegalese" yanzu haka yana kokari sauran 'yan Afirka a Italiya sun samu takardun zama don tafiyar da rayuwa ingantacciya.

"Maganar mutunci ake", inji Mamadou Lamin Gay. Yana murna yanzu ba ya zama a "Ghetto". "Har yanzu ina tune da yadda na isa can - na samu karayar zuciya", inji dan Senegal din. "Bukkokin kwalaye da ledoji - wannan ba shi ne Turan da na yi ta mafarkin zuwa ba", inji shi. Sanar da yake koyo ta ba wa Mamadou fatan samun ingantacciyar rayuwa nan gaba a Italiya.

Akasarin 'yan Afirka na son su fice daga "Ghetto", da ma Italiya, amma Brussels ta toshe musu hanya, dole 'yan gudun hijira sun nemi mafakar siyasa a kasar da suka fara sauka, haka yake cikin yarjejeniyar EU. Mai takardun tafiya na iya shiga ya kuma zauna cikin wata kasar Shengen tsawon watanni uku. Bayan haka akwai barazanar kora kamar a nan wasu 'yan gudun hijira daga Libiya dake Jamus.

"In da Barilla take, nan ne gida", abin da mazauna "Ghetto" suka rubuta a kan wani rufin bukkar kwalli da suka gina ke nan - wani gini na wucin gadi, da ba ya iya jure wa ruwa da karfin iska. 'Yan gudun 65.000 ke zaune a Italiya, akasari daga Afirka. Da yawa daga cikinsu sun gwammace su koma Afirka, wurin iyali. Sai dai ba su da kudin sayen tikitin tafiya gida.