COVID-19: Bude wuraren ibada a Nijar | Siyasa | DW | 13.05.2020
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Siyasa

COVID-19: Bude wuraren ibada a Nijar

A Jamhuriyar Nijar gwamnati ta dage dokar rufe wuraren ibada wacce ta sanya a karshen watan Maris, a wani mataki na dakile yaduwar annobar cutar coronavirus a kasar.

Niger Moschee in Niamey (Getty Images/AFP/B. Hama)

An bude wuraren ibada a Nijar

A cikin wata sanarwa da gwamnatin ta fitar a daren ranar talatar da ta gabata, ta ce ta dauki matakin bude wuraren ibadar wanda zai fara aiki daga wannan Larabar a fadin kasar ne, sakamakon shawarar shugabannin addinai na kasar. Mahukuntan na Nijar sun bayyana cewa, haka kuma sun ji ta bakin kwamitin kwararru da ke yaki da cutar ta COVID-19 na kasar, dangane da yadda annobar ta fara ja da baya.

Sai dai gwamnatin ta yi kira ga shugabannin addinai da su dauki matakai na kiyayewa da suka hadar da feshin magani a wuraren ibadar bayan kowace salla da saka takunkumi da kuma barin tazara ta akalla mita daya tsakanin mahalarta wurin ibadar da kuma wanke hannuwa da sabulu kafin shiga wuraren ibadar. Kazalika gwamnatin ta dage dokar hana yawon dare a birnin Yamai daga wannan Larabar.

Sai dai gwamnatin ta yi gargadin yiwuwar sake dawo da dokar idan aka sake fuskantar matsalar annobar. Masu rajin kare hakkin dan Adam da matasa da ke yin wasu sana'o'i da daddare, sun yi maraba da matakin dage dokar hana fita da daddaren da mahkuntan suka sanya. Tunima dai Masallatai a Jamhuriyar ta Nijar suka fara gabatar da sallolin jam'i, kamar yadda aka saba a baya kafin shigowar annobar ta coronavirus.

Sauti da bidiyo akan labarin