1. Tsallake zuwa shafin jadawali
  2. Tsallake zuwa jadawalin abubuwan da shiri ya kunsa
  3. Tsallake zuwa karin wasu shafukan DW

Chiana na bincike a duniyar wata

Gazali Abdou Tasawa
January 3, 2019

Kasar Chaina ta sanar da yin nasarar aikawa da wata na'urarar bincike a bangaren duniyar wata da ke a boye wanda shi ne na farko da aka taba yi sabanin fuskar watan da ke kallon duniya wacce ake da bayanai kanta.

https://p.dw.com/p/3AxC3
Rückseite des Mondes von der Mondsonde Chang'e-4
Hoto: picture-alliance/Xinhua News Agency

Kamfanin dillancin labaran kasar ta Chaina, Chine Nouvelle ya ruwaito a wannan Alhamis cewa na'urar wacce aka harba daga doron kasa a ranar takwas ga watan Disamban da ya gabata ta yi nasarar sauka lami lafiya a yankin mai nisa na duniyar watan da misalin karfe 10 da mintoci 26 agogon Chaina wato karfe biyu da minti 26 agogon JMT. 

Tashar talabijin ta CCTV ta kasar ta Chaina ta bayyana cewa tuni ma dai na'urar ta dauko hoton doron watan tare da aika shi ga taurarin dan Adam na Queqiao da ke hake a kewayen watan. 

Wannan dai shi ne karo na farko da aka yi nasarar samun bayannai kan siffar fuskar wata da ke a boye da kuma ta kunshi manyan tudddai da ramuka sabanin bangaren da ke kallon duniya wanda ake da bayanai da dama kan abin da ya kunsa. 

Na'urar da kasar ta Chaina ta yi nasarar aikawa a wannan sashe na wata za ta gudanar da bincike kan mitocin radiyo da arzikin ruwan da ya kunsa da kuma yiwuwar shuka tumatiri da sauran tsirrai.