Al'umma na tserewa daga arewcin Burkina Faso

Shugaban kasar Burkina Faso Roch Marc Christian Kabore ya sanar da ranaikun Laraba da wannan Alhamis din a matsayin lokutan alhini a fadin kasar biyo bayan harin ta'addancin da ya yi sanadiyyar rasuwar mutanen da yawansu ya kai 42 wadanda suka hada da sojojin kasar bakwai.

Yankunan da ke kan iyakokin kasar ta Burkina Faso da Mali da kuma Jamhuriyar Nijar na fuskantar hare-hare tun a shekara ta 2015, lokacin da masu tsattsauran ra'ayin addinin Islama suka billa a yankin na Sahel.

A farkon watan Disamban nan ne shugabannin kasashen kungiyar G5 Sahel suka gudanar da taro a Jamhuriyar Nijar don bukatar karin hadin kai tsakanin kasashen da kuma neman taimakon kasashen ketare a yaki da ayyukan ta'addancin da ke tsananta a yankin.

Wannan mummunan al'amari na ci gaba da haifar da fargaba tsakanin mazauna yankunan duk kuwa da cewar akwai sojojin Faransa akalla dubu hudu da dari biyar jibge a yankin suna aikin tsaro.